Утре и во среда не патувајте кон Грција – штрајкува царината

Сообраќајот на граничните премини од Грција кон соседните земји, меѓу кои и Македонија, утре (вторник, 2 април) и среда (3 април) ќе биде во прекин поради 48-часовниот штрајк на грчките царински службеници.

Дводневниот штрајк на цариниците ќе започне утре во 06:00 часот наутро, се очекува целосно да биде во прекин сообраќајот на граничните премини од и кон Грција за товарните возила и секаков вид пратки, а истото ќе важи и за автомобилите.

За товарните возила постојат исклучоци доколку се пренесуваат пратки коишто поради чувствителноста мора веднаш да бидат пренесени, а за автомобилите доколку станува збор за пациенти кои итно заминуваат на лекување ќе бидат пуштени, согласно протокол и договор што точно се предвидува во случај на штрајк на цариниците.

Единствено дозволено ќе биде пеш да се помине границата, иако не е исклучена можност во случај да се создадат колони автомобили да има повремено пропуштање, меѓутоа чекањето би било со часови.