Утре (четврток, 15 јуни) во Амфитеатарот во големиот градски парк во Струмица со почеток во 19:00 часот ќе биде изведена претставата „Во домот на Волшебникот“, која е работена наменски и е посветена на децата.
Токму овој период кога во регионот сериозно е видливо насилството помеѓу децата,а и кај нас,нужна е потребата преку театар да се прикаже дека за секој проблем и недоразбирање не е решение насилството, туку разговорот, меѓусебното подавање на рака, искреното пријателство. Низ низа драмски ситуации во кои главната нитка е мудроста на волшебникот, наспроти денешното однесување на децата, ќе се упати јасна порака: Со насилство НЕ, со дружба може СЕ!
Во претставата има многу комичнини, едукативни, педагошки елементи, но што е најважно интеракцијата на децата од публиката е многу присутна. Важноста заедно со актерите ќе дојдат до главната порака на претставата, а притоа да увидат дека само преку искрен и другарски пристап можеме да успееме во се.
Претставата изобилува со преубава музика, сценографија и костимографија. Во неа играат актерите кои децата ги познаваат од народните приказни. Улогата на Волшебникот ја игра актерот Сашо Ристовски, а улогата на помошничката актерката: Магдалена Ризова-Черних. Улогата на девојчето ја игра Тамара Ангелеска.
Автор и режисер на претставата е Сашо Ристовски, а истата е во продукција на приватниот театар Театар Хит – Скопје.
Изведбата на претставата е во рамките на „Струмица Опен фестивал 2023“.
