„Струмица е просперитетна, одговорна и грижлива општина која не треба да стравува за својата иднина. Ако се суди според денешната 26 седница на Советот на општина Струмица, тогаш таквата констатација на најдобар можен начин кореспондира со реалноста. Горд сум на усвоениот квартален извештај за извршување на Буџетот на општина Струмица за вториот квартал од 2023 година кој покажа реализација на приходниот дел од 44%“ – кажа градоначалникот Костадин Костадинов по усвојувањето на кварталниот извештај за извршување на Буџетот на општина Струмица за вториот квартал од 2023 година на денешната 26 седница на струмичкиот Совет. Во овој квартал вкупните оперативни расходи изнесуваат 45%, а капиталните расходи се реализирани со 27% во однос на планираните во Буџетот, што е речиси двојно повеќе од истиот период во минатата година.
Усвоен е нацртот на новиот Генерален урбанистички план на град Струмица за периодот 2023-2033 година. Според него, наместо досегашните 40 хектари зелена површина предвидени се вкупно 88.35 хектари. Согласно постојната состојба, од јавните зелени површини во градот постојат уреден градски парк со површина од 9,42 ха сместен во северо-западниот дел на градот. Има и помал градски парк во центарот на градот со вкупна површина од 0,45 ха, но и зелени плоштади-скверови со вкупна површина од 2.63 ха. Од зелените површини со ограничена намена застапено е заланило во парцелите на јавните, станбените објекти, како и индустриските комплекси. Од зелените површини со специјална намена застапени се озеленети простори за гробишта со вкупна површина од 13.86ха.
На денешната седница советниците прифатија и одлуки за усвојување на Урбанистички план за населено место Дабиља и Урбанистички план за населено место Добрејци.
Советниците едногласно ја усвоија предлог – одлуката за предефинирано мислење во врска со иницијативи за вршење на геолошки истражувања и експлоатација на металични минерални суровини во општина Струмица, а по оваа точка од дневниот ред свое позитивно мислење изрази и градоначалникот Костадинов, истакнувајќи дека неговиот став по тоа прашање е всушност составен дел од Стратегијата во делот на заштитата на животната средина на општина Струмица.
Советниците денеска прифатија и усвоија повеќе предлог одлуки на јавните општински претпријатија во Струмица, како и извештаи и програми на основните и средните општински училишта на територијата на општина Струмица.
