Усвоен Буџетот на Општина Струмица – ќе тежи близу 25 милиони евра

Буџетот на општина Струмица во новата 2024 година ќе тежи 1.525.250.690 денари или 24.800.000 евра, за околу 1.900.000 евра помалку од претходниот за тековната 2023 година. На денешната 32-ра седница на Советот на општина Струмица со гласовите на мнозинството е усвоен Буџетот на општина Струмица за 2024 година.

Од нив 700.782.690 денари се однесуваат на блок дотации, 45.727.000 денари се самофинансирачки активности на буџетските корисници, 45.131.000 денари се однесуваат на донации и средствата од основниот буџет во износ од 733.610.000 денари.

Градоначалникот Костадин Костадинов пред советниците го образложи Буџетот за 2024 година и програмите коишто ќе се реализираат, потенцирајќи дека тој ќе биде развоен и ќе го продолжи прогресот на општината и граѓаните. Кажа дека по консултациите со граѓаните преку одржаните собири по урбаните и месните заедници и форумските сесии на Буџетскиот форум на кои учествуваа претставници од руралните и урбаните месни заедници и буџетските корисници произлегле многу предлози и писмени барања кои се вградени во развојните програми и тие сега се составен дел на Буџетот за 2024 година.

На денешната седница усвоени се и Програмата за работа на Советот на општина Струмица за 2024 година и сите општински програми и повеќе извештаи, програми и одлуки во рамките на работењето на општинските јавни претпријатија и институции.