Вработените во Управата за јавни приходи во рамките на програмата за одбележување на „Св. Матеј” – Ден на даночните работници и годинава реализираа традиционална хуманитарна акција под мотото „Биди човек, биди хуман”. Како и претходните години, вработените во УЈП донираа парични средства со кои обезбедија донација за основното училиште со ресурсен центар „Св. Климент Охридски” во Ново Село.
Во име на вработените во Управата за јавни приходи, донацијата ја врачи директорката Елена Петрова која изјави дека:
„Со лични средства кои ги донираа даночните работници, а според утврдените потреби на училиштето набавени се: Инвертер клима – уред, машина за перење со капацитет од 11 килограми, средства за хигиена и чоколади, она на што најмногу се радуваат децата. Вкупната вредност на донацијата изнесува 123.000 денари.“ – информираше директорката на УЈП, Елена Петрова која и ја врачи донацијата на директорката на училиштето, Слаѓана Радојчиќ.
Директорката Петрова, потенцираше дека целта на оваа акција е да се поддржат најмладите и да се овозможат подобри услови за нивното образование и секојдневие.
„Секако би сакала оваа наша акција и донација да биде мотив и за останатите институции и поединци да поддржуваат вакви иницијативи и да го зајакнуваат духот на заедништво и емпатија во нашето општество“ – додаде Петрова.
Директорката на училиштето „Св. Климент Охридски“, Слаѓана Радојчиќ изрази благодарност за посетата на директорката на УЈП и за поддршката од вработените во УЈП, нагласувајќи го значењето на оваа донација за подобрување на условите во училиштето кое функционира од 1986 година, а во моментов во него учат 29 ученици со попреченост, од трето до деветто одделение. Од нив 15 се интернатски сместени, а 14 патуваат од и до училиштето секој ден. Училиштето е и ресурсен центар кој го покрива југоисточниот регион на државата.
