Трибината на СДСМ во преполна спортска сала: Струмица е симбол на социјалдемократијата

Владејачката СДСМ синоќа организира граѓанска трибина во Струмица, каде Спортската сала „Парк“ беше преполна со граѓани и симпатизери на партијата. Говореше лидерот на СДСМ и актуелен премиер Димитар Ковачевски, кој порача дека Струмица е симболот на социјалдемократијата.
„Не случајно СДСМ победуваше во Струмица дури и тогаш кога беше најтешко, кога целата држава беше заробена од страна на ВМРО-ДПМНЕ цели 11 години. Струмица е олицетворение на што сме ние, социјалдемократите“ рече Ковачевски.
Во своето обраќање тој истакна и дека СДСМ е печатот на македонската европска идеја и напредокот од осамостојувањето до денес.
„СДСМ е дел од континуитетот на државничките одлуки во исполнување на македонските национални стратешките цели поставени уште од независноста. 31 година СДСМ е на вистинската страна на историјата и за тоа секој социјалдемократ, секој од вас овде присутен во ова сала е особено горд“ – кажа Ковачевски.
Актуелниот градоначалник на Струмица и член на Извршиот одбор на СДСМ, Костадин Костадинов кажа дека локалната и централната власт предводени од СДСМ на дело покажуваат што значи вистинска грижа за општините, за граѓаните и државата.
„Симбиозата помеѓу Општина Струмица и централната власт функционира и дава резултат, таквата соработка обезбедува реализација на многу важни проекти како детски градинки, фекална и атмосферска канализација и изградба на социјална населба, како најкапитален проект во општина Струмица. 40% од предизборната програма што ја дадовме пред граѓаните е веќе реализирана или е во фаза на реализација“ – кажа Костадинов и најави изградба на фотоволтаична електрана во сопственост на Општина Струмица, со што ова општина ќе биде целосно енегретски независна.
Претседателот на струмичките социјалдемократи, Борче Цветков нагласи дека СДСМ со своите државотворни политики, продолжува по трасираниот пат кој води кон сигурна иднина и дека по членството на земјата во НАТО, владините политики продолжија да нижат успеси на сите можни полиња од општественото живеење, кои граѓаните ги прават спокојни, сигурни и охрабрени.
Цветков меѓу успесите на СДСМ ги наведе сигурниот од кон Европската Унија, влезот на голема врата на македонскиот јазик во европските институции, цврстиот опстој на браникот на македонскиот идентитет, одличната меѓународна политика, 36-то место на листата на најбезбедни земји во светот, бројните мерки за помош на граѓаните и стопанството во услови на криза, континуираниот раст на платите и пензиите, одличната социјална политика, низата ангажмани за прогрес во енергетиката, стопанството, земјоделството, образованието, здравството, културата.