По 14-ти пат синоќа во градот под Царевите кули, во градот на музиката и расадникот на најдобрите вокали се одржа фестивалот на староградски песни и серенади „Под кулите на Струмица 2024“.
Традицијата продолжува како што продолжува и желбата за староградската песна и серенада, кои во минатото се задоволувале преку постоење на мали пејачки групи, хорови, ансамбли и културно уметнички друштва.
Староградските песни и серенадите кои никогаш и не беа заборавени, беа дел од богатата културна понуда на Струмица, преку овој фестивал посветен токму на староградската песна и серенадата.
Фестивалот „Под кулите на Струмица 2024“ почна со заедничко фотографирање на сите учесници пред Центарот за култура „Антон Панов“ и изведба на неофицијалната химна на Струмица и на самиот фестивал, познатата староградска песна „Под кулите на Струмица“, а продолжи на големата сцена во Центарот со настапот на четирите ансамбли, „Распеани Струмичани“, „Распеани Валандовчани“, „Распеани Гевгеличани“, „Распеани Радовишани“, вокално-инструменталниот состав „Орнаменти“ од Штип и октетот „Прилеп“.
Публиката имаше ретка можност да ужива во интерпретациите на прекрасни македонски староградски песни и серенади, каде преовладуваше љубовта како главна тема.
Фестивалот „Под кулите на Струмица“ е од ревијален карактер, а се одржува под покровителство на Министерството за култура и Општина Струмица.
