Градоначалникот на општина Струмица, Петар Јанков на Фејсбук објави дека за нов директор на Јавното претпријатие за енергетски дејности „Струмица Гас“ е именуван Томчо Стојчев.
Според објавата кај градоначалникот, Стојчев е високообразуван и реномиран стручњак, дипломиран машински инженер и магистар по технички науки, со богато и разновидно професионално искуство. Неговата кариера се одликува со долгогодишна успешна работа во приватниот сектор, каде што стекнал значајни практични знаења, управувачки вештини и резултатска ориентација, неопходни за раководење со сложени технички и инфраструктурни системи.
Во своето досегашно работење, како инспектор за безбедност и здравје при работа во Државниот инспекторат за труд, Стојчев покажал високо ниво на професионалност, посветеност кон почитување на законските прописи, заштита на работниците и унапредување на стандардите за безбедност, со што се истакнал како кадар со висок интегритет, одговорност и чувство за јавен интерес.
Со изборот на стручен, докажан и визионерски кадар, локалната самоуправа прави значаен исчекор кон модерно, ефикасно и одговорно управување со ЈПЕД „Струмица Гас“. Од Општина Струмица очекуваат дека новото раководство ќе придонесе за зголемување на безбедноста, ефикасноста и квалитетот на услугите, како и за забрзан и одржлив развој на гасификацијата, што директно ќе влијае врз економскиот развој, енергетската стабилност и подобрување на квалитетот на живот на граѓаните.
