![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Струмичкиот Народен театар „Антон Панов“ синоќа со Изложба на фотографии и премиерна изведба на претставата „Црна дупка“ го одбележа големиот јубилеј – 75 години постоење на театарот во Струмица, кои се навршуваат на 1 мај, ден кога во 1949 година е изведена првата драма „Бегалка“ од Васил Иљоски во режија на Димитар Колчаков.
Подготовките за неговото основање започнуваат на крајот на 1948 година, кога локалната самоуправа во Струмица донесува одлука за формирање театар и дозвола за изградба на театарска зграда. Градски народен театар – Струмица е првиот професионален театар основан во источна Македонија. Театарската зграда, денес позната како Стариот театар, е изградена на улицата „Боро Џони“ во централното градско подрачје, во близина на некогашното кино „Балкан“.
Директорката на НУ Центар за култура „Антон Панов“, Белагија Аливкинова отворајќи ја изложба кажа дека преку објективот на Сречко Гунчев и реално тешкиот избор да се селектираат фотографии од илјадници направени настани се успеа да се долови енергијата и чистата магија која се создаваше во живо на сцената низ годините.
„Секоја фотографија раскажува приказна, како сведоштво за моќта на театарот да ги обединува, инспирира и надминува границите. Тоа е и почит за безброј актери, режисери, сценографи, музичари кои биле наши гости и оставија неизбришлива трага низ времето. Но театарот „Антон Панов“ е повеќе од обична галерија или сцена, тоа е светилиште за љубителите на културата, место за негување на таленти кои се појавуваат и место кадешто се создаваат доживотни пријателства во тој процес низ годините“ – кажа директорката Аливкинова на синоќешното одбележување за 75-годишниот јубилеј.
Во фоајето на Центарот за култура поставени се 34 фотографии од претстави кои го прикажуваат периодот од 1994 до 2023 година, период кога Сречко Гунчев бил вработен во установата и бил официјален фотограф на сите настани кои се случувале таму.
„Не ми беше многу лесно да ги одберам фотографиите на кои ќе бидат застапени повеќе наши родокрајни автори, режисери кои работеле овде кај нас, сите тие кои биле пензионери – актери кои и веќе не се меѓу нас. Од 135 претстави требаше сето тоа да се одбере и да ги задоволам апетитите на сите актери за да бидат застапени. На овие фотографии има и актери кои не се вработени во нашиот театар, но одиграле претстава во тој период“ – кажа Гунчев.
По отворањето на изложбата, ансамблот на Струмичкиот театар премиерно ја изведе претставата „Црна дупка“ од Горан Стефановски, а во режија на Љупчо Ѓоргиевски. Сценографијата е на Валентин Светозарев, костимите на Андреј Ѓоргиевски, музиката – Сашко Костов. Играат: Васил Михаил, Танкица Стојанова, Анкица Бенинова, Јасмина Вучкова, Кире Ѓоргиев, Елисавета Бончева, Коста Ангов, Ангелина Тренчева-Ангелова, Јулија Милкова, Стојан Велков-Трн, Илија Младенов и Теодора Арсов.
