Струмичките пензионери утрово го блокираа влезот во градот – бараат оставка од министерката Јована Тренчевска

Утрово група пензионери го блокираа влезот во градот Струмица од кај Радовиш. Сега бараат 5.000 денари на минималните пензиите, а од ноември линеарно зголемување од 7.500 денари. Револтирани се од ингнорантскиот однос на државата и побараа оставка од министерката за труд и социјална политика, Јована Тренчевска.

Велат дека моменталните пензии што ги примаат не биле доволни ниту за преживување од први до први во месецот, трошоците постојано им се зголемувале, а социјалните разлики станувале се поголеми. Сметаат дека нивните барања се реални и остварливи, посебно линеарното покачување со кое сите ќе добијат исти третман од државата.

„Веќе трет месец протестираме, а досега надлежните немаат слух за нашите барања. Срамота е ова. Бараме линеарно покачување оти со процентуалното нашите пензии ќе се зголемат за 700 денари. Сега бараме 5.000 денари зголемување и минимална пензија од 18.000 денари. Со ноемвирската пензија линеарното зголемување да биде 7.500 денари, а минималната пензија 20.000 денари. Жално е во 21 век пензионер да зема под 18.000 денари“, кажа Мите Митев од иницијативниот одбор на пензионерите од Струмица.