Интегрално го пренесуваме соопштението на еколошкото здружение „Здрава Котлина“ од Струмица во врска со депонијата „Шапкар“ кај струмичкото село Доброшинци, општина Василево, која е во пламен неколку дена:
„КАНЦЕРОГЕНИОТ ПЕКОЛ ВО СТРУМИЧКАТА КОТЛИНА
Моментално депонијата Шапкар до селото Добрашинци гори веќе 5ти ден, но оваа информација очигледно не предизвикува никаква загриженост скоро кај никого зошто се смета дека е нешто незначително и далеку. Нешто што нема влијание на никого освен можеби на блиските села Добрашнци, Висока Маала и Нова Маала… Но колку сте сигурни дека така стојат работите??!
Група наши активисти синоќа беа на депонијата Шапкар и направија снимки од кои дел одеа во живо на страницата на Здрава Котлина. Она што го затекнаа таму беа надреални апокалиптични сцени на црн, отровен, смрдлив, канцероген чад и пепел од огромни пламени јазици кои се ширеа во периметар кон сите правци освен кон патот за Добрашнци. Жежок ветар го носеше чадот од запаленото ѓубре и вегетација во густи каделки чад небаре е парадоксален есенски маглив ден со ветар што ја згуснува наместо да ја растерува маглата. Нема зборови што можат да го опишат гротескните сцени на локалната апокалипса што се случува таму, но и одвратниот молк на сите нас кои го игнорираме подмолниот отров што колективно го дишеме. Не можеме ни да замислиме како секојдневно тече животот во отруените блиски села Добрашнци, Висока Маала и Нова Маала кога ветерот ќе го сврте правецот на дување од градот кон нив. Ова е поразително…
Депонијата гори на повеќе различни локации на приближно 2 км2 површина. За илустрација тоа е површина колку половина Струмица. Чадот што се издига до небото е црн, отровен, смрдлив, канцероген, леплив… Тоа е истиот чад што ја исполнува Струмичката котлина со сите населени места во неа вклучувајќи го и градот Струмица. Мирисот на изгорено што се чудете од каде доаѓа во вечерните часови треба да ви биде јасно дека е од депонијата Шапкар. Треба да ви биде јасно дека тогаш сте вдишале отровни канцерогени честички во вашиот организам кои ќе предизвикаат сериозни последици зависно од каков хемиски состав сте имале несреќа да вдишете. Диоксини, фурани, тешки метали, флуороводороди, хлороводороди, полихлорирани бифенили и што се не…
Ова е особено важно за децата и повозрасните кои се посебно осетливи на респираторни заболувања. Дополнително канцерогените честички од чадот се таложат во водите на вештачката акумулација Турија што понатаму оди за водоснабдување на Струмица и наводнување на земјоделските површини во Струмичко поле. Чадот оди и во земјоделските плодови кои се контаминираат со секој ден што гори депонијата. Така или вака, канцерогениот отров влегува во сите нас и нашите деца па да не се чудиме зошто последиците од ова зло се појавуваат зачестено во популацијата.
Во моментов НЕ ПОСТОИ НИШТО ДРУГО СО ПОГОЛЕМ ПРИОРИТЕТ ОСВЕН ВЕДНАШ ДА СЕ ИЗГАСИ ДЕПОНИЈАТА ШАПКАР и да се направи се што е неопходно за да се спречи секакво ново палење! Ангажман на дополнителен број на работници со соодветна механизација и опрема но особено да има ЗАШТИТНИ МАСКИ СО КИСЛОРОД за секој таму што ќе работи во тој отровен пекол. Поголеми слоеви земја помеѓу два слоја депонирано ѓубре и ако е можна макар груба селекција да се одвои комунален и растителен отпад за да спречи палење и контрола. Дополнително мора да се постават тајмлапс камери што со широк објектив јавно ќе прикажуваат што се случува на депонијата 24 часа, секој ден во неделата, сите денови во годината…
Се друго е тешко лицемерство од секого што ќе се спротивстави затоа што секој ден горење ја убива иднината во Струмичката котлина и сите други проекти се само непотребна тешка глупост ако не ја запреме ламјата што живее во канцерогениот пекол во депонијата Шапкар кај Добрашнци.
Ги повикуваме општинските совети на Општина Струмица, Општина Василево, Општина Босилово и Општина Ново Село веднаш и неодложно да одржат вонредни седници и заеднички да настапат во итното решавање на горењето на депонијата затоа што сите граѓани се директни и индиректни жртви преку сте рецептори на загадувањето што се генерира со горењето на ѓубрето и отровите што се ослободуваат при таквото неконтролирано горење. Ова особено важи за ЈПКД “Комуналец” Струмица поради нивната законска одговорност за работењето на депонијата Шапкар.
Ги повикуваме СИТЕ пратеници да делуваат во Собранието на Република Македонија за решавање на овој проблем!
Ја повикуваме Влада на Република Северна Македонија да интервенира и помогне на секаков начин за да се спречи масовното труење на граѓаните!
Ако не се реагира веднаш ќе организираме низа активности што на никого нема да му се допаднат но немаме друг избор!
ОВА Е СЕРОЗЕН ПРОБЛЕМ КОЈ МОРА ВЕДНАШ ДА СЕ РЕШАВА И ДА СЕ ЗАПРЕ ГОРЕЊЕТО НА ДЕПОНИЈАТА ШАПКАР ВО НАЈКРАТОК МОЖЕН РОК!!!“
