Претставата на Струмичкиот театар, „Црна дупка“ од Горан Стефановски, а во режија на Љупчо Ѓоргиевски жирито на годинашното издание на Меѓународниот театарски фестивал „Војдан Чернодрински“ ја прогласи за најдобра претстава, доделувајќи им ја наградата за уметничко остварување на претстава во целина, што е всушност, награда за најдобра претстава на фестивалот. Актерот Васил Михаил, кој ја игра улогата на Силјан, ја доби наградата за главна машка улога, додека актерката Анкица Бенинова награда за женска епизодна улога за улогата на Сања во истата претстава.
Наградите беа доделени од страна на фестивалската жири-комисија во состав: д-р Марина Миливојевиќ Маѓарев – театарски критичар, авторка, драматург, професор по историја на светска драма и театар на Катедрата за теорија и историја на драмските уметности и анализи на драмското творештво на Катедрата за драматургија при Академијата за уметности при Универзитетот во Нови Сад, д-р Марина Катниќ Бакаршиќ – стилистичарка и професор на Академијата за сценски уметности и на Филозофскиот факултет при Универзитетот во Сараево, БиХ и Варја Ѓукиќ – актер, автор и директор на фестивалот „Одакле зовем“ – Подгорица, (2009).
Марина Миливојевиќ Маѓарев истакна дека претставата „Црна дупка“ има хармоничен однос кон сите елементи на претставата – сценографијата одговара на стилот на претставата, глумата е усогласена со стилот, режисерската е јасна, но не е наметлива, и тоа што е значајно што актерите беа многу професионални и не им влијаеа техничките проблеми што ги имаа. Тие многу одлучно ја водеа својата претстава. Тие покажаа дека ја сакаат својата претстава. И многу е важно да се посочи дека играа дело според авторот во фокус.
„Струмичкиот театар по 45 години од историјата на овој фестивал, ја добива наградата за најдобра претстава, токму оваа година прославува 75 години постоење. Постарите прилепчани ги знаат добрите времиња на струмичкиот театар, кога освојуваше награди. Се надевам дека ова ќе ни биде поттик за следната година, имаме тим, актери, техники, голема благодарност до режисерот Љупчо Ѓоргиевски во името на целиот ансамбл“ – кажа раководителот на Струмичкиот театар, Драган Маџиров примајќи ја наградата во име на целиот колектив.
