Струмичкиот карневал им откажа гостопримство на десетина странски групи, Струмица нема каде да ги смести

1126 маскирани лица од кои 340 од странство ќе продефилираат низ струмичките улици и ќе се претстават на главната сцена на градскиот плоштад на 25 февруари. Годинава им се откажа гостопримство на десетина странски карневалски групи, Струмица нема каде да ги смести.

„За жал годинава заради неможност да ги сместиме сите заинтересирани моравме да им откажеме гостопримство на десетина заинтересирани групи од странство, но дадовме предност на тие со кои повеќе години соработуваме и разменуваме карневалски групи. Проблемот околу сместувањето е во тоа што неколку хотели се затворени, а еден поголем се реновира и со тоа изгубивме околу 400 места во кои досега ги сместувавме гостите“ – кажа претседателот на Организациониот одбор, Александар Цицимов на денешната прес конференција.

На 25 февруари ќе се претстават 14 карневалски групи од странство. Најмногу ги има од Србија, од градовите Лесковац, Врњачка Бања, Шабац, Раковица и Бела Црква. Од Црна Гора доаѓаат три карневалски групи, од Тиват, Херцег Нови и Будва, а од Хрватска пред струмичани ќе се претстават две карневалски групи од Ријека. По една карневалска група ќе има од Грција, Босна и Херцеговина и Бугарија.