Градоначалникот на Струмица, Костадин Костадинов во рамките на посетата на Љубљана, Словенија со негови соработници од Општина Струмица, вчера имаше средба и со градоначалникот на Љубљана, Зоран Јанковиќ.
„Со мојот домаќин реализиравме продуктивна работна средба во чии рамки разговаравме за економската (не)зависност на општините, соработката со бизнис-секторот и можностите за финансирање на општините од странски фондови, како предуслов на патот кон прогрес. Со задоволство можам да кажам дека отворениот разговор и неговите укажувања и посочени клучни точки и фактори во предводењето на единица на локална самоуправа резултираа со иницијатива за интензивирање на комуникацијата, на соодветно ниво, со што сметам дека Струмица ќе добие силен поддржувач во планирањето и реализацијата на политиките за управување и водење на општината“, информираше градоначалникот Костадинов на социјалните мрежи.
Посетата во Љубљана, Костадинов ја искористи да се сретне и со познати струмичани кои живеат, работат и студираат во овој град. Тој се сретна со кошаркарската легенда Владо Илиевски, капитенот на македонската одбојкарска репрезентација Никола Ѓоргиев, научникот и професор Томе Ефтимов и студентот и еден од најдобарите математичари од струмичката гимназија, Димитар Џорлев.
„Јас сум горд градоначалник драги мои, оти вие сте најголемите амбасадори на Струмица и ја претставувате Струмица таква каква што е, Најдобра“, напиша Костадинов.
