![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Во издание на ЛУ Библиотека „Благој Јанков Мучето“ од Струмица, синоќа беше промовирана книгата со поезија „Заточена светлина“ од Смилана Василевска, сопругата на познатиот писател и новинар Иван Василевски.
Денот на промоцијата, 28 март е годишнината од смртта на Иван Василевски, и таа сакаше токму на тој ден да ја промовира својата книга посветена на сопругот Иван и синот Вартан, кои оддамна не се со неа во животното патување, но се покрај неа на Преведена.
Промоцијата ја отвори директорот на Библиотеката „Благој Јанков Мучето“, Денис Мустафов кој кажа дека се надева ова книга ќе им се допадне на многу љубители на убавиот пишан збор, бидејќи истата е напишана со срце и од душа од нашата роднокрајна авторка Смилана Василевска.
Рецензентот на „Заточена светлина“, Ѓорги Калајџиев евоцираше спомени со писателот Иван Василевски и неговото семејство, говореше за Смилана која прва го читаше секој напишан стих или текст на Иван и ја даваше првата книжевна критика за напишаното.
„Во стиховите на „Заточена светлина“ може да се препознае ненаметливото влијание на мајсторското поетско кредо на Иван Василевски , кое низ годините на љубовното заедништво потајно мигрирале од една во друга духовна постојбина. Тоа е времето кога двете души станувале една, тоа е времето кое Смилана со префинет усет за грижливо паметење го спаструва во најголемиот дел од своите стихови. Небаре станува збор за аманет, за скришен завет кон љубениот, низ поетски изблив да се придодаде нова епизода во судбинското сценарио на една вонвременска љубов. Поетскиот обид на Василевска, опстојувајќи во таа намера, е повеќе од успешен. Токму затоа, кај мене насловот на стихозбирката има двојна импресија. Час животната разделба засекогаш ја ставила во заробеништво некогашната светлина на животот и љубовта, час таа светлина од спомени останува заточена во меморијата на поетесата, за да и биде светилник во изнаоѓањето на патот по кој таа чекори низ животот“ – кажа рецензентот Ѓорги Калајџиев.
На промоцијата стихови од книгата „Заточена светлина“ читаа легендата на струмичкото и македонското спикерство, Гонца Шивачева и ќерката на Смилана, Наташа Василевска Трајчевска.
Ова е втора книга на Смилана Василевска, по првата „Песната на гугутката“ издадена во 2016 година.
