Струмичанката Сузана Мицева и Александар Методијев добитници на наградата за најдобра новинарска сторија што ги доделува СЕММ

Новинарите Сузана Мицева од Струмица и Александар Методијев за видео-сторијата „Кревките шуми“ се добитници на првата награда за најдобра новинарска сторија на тема „Факти и дезинформации за човековата околина“ која ја доделува Советот за етика во медиумите на Македонија.

За потребите на ТВ емисијата со наслов „Кревките шуми“ наградените автори Александар Методијев и Сузана Мицева ги следат трагите на големи количини илегално исечени дрва, водени низ планинските превои на Јабланица од локални еко-активисти кои алармираат дека во „организиран бизнис“ неповратно страда природата во нивната околина, без интервенција од институциите што ќе ја запре илегалната сеча.

На повикот пристигнале 20 трудови од 13 новинари, а во жири комисијата учествувале, Билјана Георгиевска – директорка на СЕММ, Васко Маглешов – новинар и Кирил Сотировски, декан на факултетот за шумарски науки.

Претседателката на СЕММ, Билјана Георгиевска на доделувањето на наградите истакна дека наградата што ја доделуваат е обид и поттик овие теми да се најдат повисоко во агендата на медиумите.

„Добивме 20 трудови, тоа нѐ радува бидејќи темата е врзана со една тесна област која неправедно во другите медиуми е потисната и ретко гледаме цели емисии за животната околина, на фактите кои што сѐ уште ги немаме најчесто во нас и на дезинформациите кои го одвраќаат вниманието и спречуваат да се случи акција“, рече Георгиевска.

Шефот на Делегацијата на ЕУ во Македонија, амбасадорот Дејвид Гир, истакна дека е време за дејствување по овие теми.

Со цел да се случи тоа, јавноста мора да има пристап до веродостојни информации во однос на обемот на овие прашања, во однос на одговорноста и можните дејствувања за тоа да се намали, рече тој.

Според него, тука новинарите имаат клучна улога, со тоа што ќе ја информираат јавноста, ќе ги расветлат злоупотребите и праксите кои што се практикуваат, а притоа ќе прикажуваат и кои се добри модели за дејствување“.

СЕММ ги доделува наградите како активност во проектот „Градење доверба во медиумите на Југоисточна Европа: Поддршка на новинарството како општо добро“, поддржан од УНЕСКО и Европската Унија.