Ликовната уметница од Струмица, Кристина Зимбакова од 12 до 19 јануари беше дел од 20-от Меѓународен симпозиум за габи и текстил во Лас Палмас на островот Гран Канарија во северозападна Африка.
Настанот е организиран од Меѓународниот институт за бои од габи (САД), што доделува две престижни стипендии за учество, од кои едната ја доби Зимбакова, а на симпозиумот се претставија 92 учесници од 19 земји.
Кристина Зимбакова првпат учествуваше на групна изложба и на неа се претстави со три дела на хартија од габи во комбинирана техника.
На 14 јануари Зимбакова одржа и предавање за својата уметност, насловено „Габите во дела од современото сликарство“, со акцент на процесот за изработка на хартија од габи, како и нејзиниот карактеристичен мозаик од габи. Нејзиното беше едно од трите главни предавања на овој интердисциплинарен светски собир што се одржува на секои три години, а каде земаат учество уметници, инженери и научници чија преокупација се боите за текстил и хартијата добиени од габи. Настанот се состои од изложба, работилници, како и истражувачки терени за габи во суптропски шуми со ендемични видови дрвја на островот Гран Канарија.
Во творештвото на Кристина Зимбакова (1975, Струмица) се спојуваат сликарството, природните науки и поезијата, а габите и лишаите се најзастапен медиум. Нив авторката ги собира по планините низ Македонија, а добива и ретки и впечатливи примероци од биолози од други континенти. Досега имала 11 самостојни изложби во Македонија, Ирска, Грција и Бугарија, а учествувала на бројни групни изложби низ Европа и САД.
