Струмичани се поклонија пред моштите на Свети Василиј Велики. Во чест на големиот христијански празник Обрезание Господово и Свети Василиј Велики, моштите на големиот светец беа изнесени за поклонение на верниците.
Голем број верници уште од синоќа почнаа да ја посетуваат црквата „Свети Кирил и Методиј“ во Струмица, во која беа изложени моштите, со цел да се поклонат пред нив и да се помолат за здравје за нив и за нивните семејства.
Моштите на Свети Василиј Велики, Струмица ги има уште од 1830-та година. Тука нив ги донел војник кој во тоа време бил на служба во Кападокија. Од тогаш тие грижливо биле чувани во црквата и ретко кој знаел дека постојат.
Пред дваесеттина години Струмичката Епархија одлучила секоја година во чест на празникот на Свети Василиј, моштите да се изложуваат со цел и верниците да имаат можност да се поклонат пред нив.
Во чест на големиот христијански празник вчера и денеска во храмовите во Струмица се служеше света Василиева литургија, а на поклонение пред моштите на столбот на светото православие, Свети Василиј Велики организирано дојдоа и голем број верници од неколку градови од државата.
