Струмичани да можат бесплатно да се приклучуваат на гасоводната мрежа – му предлага на Советот градоначалникот Костадинов

Градоначалникот на општина Струмица, Костадин Костадинов во присуство на дел од членовите на Советот на општина Струмица најави дека поднесол предлог до советниците за субвенционирање на домаќинствата за целосно ослободување од надоместокот за приклучок на гасификационата мрежа во износ од над 750 евра по домаќинство.

„Да се превенира одредена појава не значи таа да се дискутира само тогаш кога тоа ни се случува како што е загадувањето, и затоа денеска сакаме да најавиме дека од понеделник Советот ќе биде исправен пред носење на огромна одлука, а тоа е субвенција на домаќинствата за целосно ослободување од надоместокот за приклучок на гасификационата мрежа во износ од 46.943 денари по домаќинство“ – кажа градоначалникот Костадинов.

Граѓаните ќе треба само да ги заменат дрвата и пелетите со приклучок на гасификационата мрежа и како доказ да достават една платена фактура за да ја добијат субвенцијата. Оваа мерка ќе се реализира по принципот прв дојден, прв услужен по објавувањето на Јавниот повик од страна на Советот на општина Струмица.

„Апелирам и мотивирам што поголем број граѓани да ги искористат овие бенефиции што ги нудиме. Природниот гас е најдобрата инвестиција којашто ја има Струмица и да ги искористиме нејзините благодети за почист воздух и поздрава животна средина“ – додаде Костадинов.

Првата мерка – директно субвенционирање на цената на гасот од 10 денари по метар кубен гас, ќе остане важечка.

На прес конференцијата присуствуваше и директорот на ЈПЕД „Струмица Гас“, Благој Милановиќ кој потенцираше дека цената на гасот во последните три месеци е непроменета и стабилизирана и сега еден киловатчас се наплаќа по 5,21 денари, односно со субвенцијата од Општина Струмица таа изнесува 4,3 денари. Тој додаде дека инвестицијата која граѓаните треба да ја направат за да се префрлат на природен гас ќе им се исплати за неколку години и е поисплатлива од другите енергенси.