Градоначалникот на општина Струмица, Костадин Костадинов со претставници од општински јавни претпријатија е во дводневна работна посета на главниот град на Словенија, Љубљана.
Градоначалникот Костадинов, секретарот на општината Александар Оџаков, шефицата на кабинетот Лефка Танева, директорката на ЈП „Стационар Лана“, Сузана Стојкова и раководителот на Секторот за Комунална хигиена во ЈПКД „Комуналец“, Бранко Ѓоргиев го посетија Градското транспортно претпријатие „Љубљански патнички промет“, каде собираа искуства и информации за функционирањето на градскиот превоз, кој веќе од почетокот на следната година ќе се воведува и во општина Струмица.
„Имајќи го предвид претстојното формирање на струмичкото јавно претпријатие за транспорт, слушнав многу корисни информации и податоци и стекнав уште подобра слика за прогресот на јавниот транспорт во Струмица. Благодарам на домаќините за времето и поддршката“, напиша градоначалникот Костадинов на својот Фејсбук профил.
Делегацијата од Општина Струмица во текот на вчерашниот ден беше и во посета на јавното комунално претпријатие на Љубљана, како и во „Засолништето за напуштени животни“, каде во пракса видоа како Љубљана, која можеби е единствената метропола во која нема бездомни животни, се справува и ги третира животните.
„Општина Струмица е на вистинскиот пат долгорочно да го решава овој проблем“, објави струмичкиот градоначалник Костадинов кој денеска ќе се сретне и со градоначалникот на Љубљана, Зоран Јанковиќ.
