Општина Струмица и бугарската општина Крџали се збратимија. Градоначалниците Костадин Костадинов и Хасан Азис денеска потпишаа Меморандум за збратимување.
„Овој чекор е пример како во пракса се гради и развива добрососедството – преку кооперативност, труд, работа и пред сé – доверба, нешто кое денес безрезервно го демонстриравме. Уверен сум дека долгогодишните политики и практики на општина Струмица во соработката со општини од Бугарија базирани токму на овие принципи и понатаму ќе продолжат да резултираат со успех. Доказ за тоа се и досега успешно реализираните, голем број Европски проекти, направени за доброто на сите граѓани, независно од која страна на границата живеат. Благодарност на мојот домаќин за гостопримството и верувам дека во ваков манир ќе чекориме заеднички и кон прогрес“, кажа струмичкиот градоначалник Костадинов по потпишувањето на меморандумот.
Градоначалникот на Крџали, Хасан Азис кажа дека времето дава можност и поголема одговорност токму денес и сега и токму меѓу Крџали и Струмица да се потпише договор за збратимување.
„Времето го бара овој чин, со кој Крџали и Струмица ја даваат оваа порака за обединување, порака дека обединети стануваме посилни, вклучително и порака за остварување на европскиот сон за обединета Европа“, кажа Азис, потенцирајќи дека од денеска двете општини ќе започнат разговори за конкретни заеднички настани, меѓу кои образовната размена во рамките на програмата Еразмус плус, културната размена, размената во областа на економијата и бизнисот.
На чинот на потпишувањето на Меморандумот во општина Крџали присуствуваа и претседателот на Советот на општина Струмица, Марјан Даскаловски, секретарот на општината, Александар Оџаков и членот на струмичкиот Совет, Александар Ненчев.
Збратимувањето на двете општини беше поттикнато при посетата на европратеникот, Илхан Ќучук и градоначалникот на Крџали, Хасан Азис на Струмица во декември минатата година кога беше и најавена соработка која ќе отвори дополнителни можности за комуникација и перспективи меѓу двете општини.
