![almak](https://strumicanet.com/wp-content/uploads/2024/11/srnet-banner-noe-2-optimized.png")
Струмица синоќа пулсираше во ритамот на најдобрите светски забави. Бидна уште едно издание на познатиот европски карневалски бренд наречен „Струмички карневал“. Околу 1200 маскирани лица создадоа 40-тина маски со кои продефилираа низ струмичките улици, а уште многу повеќе неофицијални низ секое мало и големо сокаче, низ струмичкото корзо, во угостителски објекти…
Струмица синоќа беше под маска, струмичани празнуваа, ги угостија добронамерниците дојдени од сите краишта на Македонија, од Србија, Црна Гора, Хрватска, Босна, Грција, Бугарија, Шведска, Германија, Холандија, Италија, Словенија, Турција. Убавина од маски насекаде низ градот. Три и пол часа дефиле низ центарот, карневалистите ги покажаа своите креации кои со месеци ги создаваа. Сите имаа и своја порака.
Имаше курназ баби, глуварчиња, свемирски брод, часовници, струмичка корида, бабачки парчиња од торта, рударчиња, китки, принцези, далматинци, Волшебникот од ОЗ, имаше многу љубов, многу музика која со играта на карневалџиите имаше волшебен сјај. Но нешто фалеше, го немаше раскошот од огромни прекрасни маски кои го привлекуваа вниманието на публиката. Само „Струма“ со „копнежот“ ја задржаа годинава таа грандиозност на својата маска.
Публиката тука, како и секогаш со внимание ги следеа сите карневалски настапи. И политичари дојдоа да го следат карневалот, и од Влада, имаше и амбасадори, градоначалници, спонзори и пријатели на карневалот. На Струмичкиот карневал беше и комплетниот Борд на Федерацијата на Европските карневалски градови на чело со претседателот Ларс Алгел од Шведска.
Карневалското празнување за струмичани продолжува и денеска со Детскиот карневал во 11:00 часот, утре со Чист понеделник, а во вторник организаторите ќе се обидат да потсетат на карневалот во вторник, вечерта пред Тримери, со Карневалско корзо и доделување награди на најдобрите маски, а со Тримерскиот обичај во среда ќе заврши годинашното издание на Струмичкиот карневал.
