Струмица и Противпожарната единица добија ново противпожарно возило и дрон за откривање пожари

Противпожарната единица на Струмица доби специјализирано противпожарно возило – мал противпожарен камион за потребите на Територијалната противпожарна единица.

Станува збор за специјализиран мал камион во вредност од 107.000 евра кој ќе се користи за гаснење шумски пожари и спасување со цел да се покријат потребите на општината Струмица, како и на руралните општини од струмичкиот микро регион, вклучувајќи ги општините Босилово, Василево и Ново Село.

Новото специјализирано противпожарно возило е обезбедено од Центарот за развој на Југоисточниот плански регион преку проектот „Рано откривање на пожарите и нивно движење за превенција и справување со катастрофи – eFIDAR“, кој Центарот го имплементира заедно со Регионот на Централна Македонија, Грција и Центар за управување со кризи, Република Северна Македонија. Проектот е финансиран од страна на Европската Унија преку Интеррег ИПА Програмата за прекугранична соработка помеѓу Грција – РС Македонија, Реф. Бр. CN2-SO2.4-SC044.

Центарот за развој на Југоисточниот плански регион, како дел од проектот eFIDAR во своите напори за подобрување на реакцијата во случај на шумски пожари, набави и три специјализирани дронови со термална камера за рано откривање на пожари со резервни батерии од производителот DJI Модел: Mavic 3 Thermal за ТППЕ Струмица, Гевгелија и Радовиш. Со цел успешно управување на овие дронови и соодветно прибирање на информации, Центарот организира дводневна заедничка тренинг програма за сите засегнати страни меѓу кои се претставниците на четирите ТППЕ од регионот, претставници од Центарот за управување со кризи, како и Дирекцијата за заштита и спасување. Оваа иновативна обука ќе им овозможи на засегнатите страни да ги користат дроновите како моќно средство за рано откривање и следење на пожарите во реално време.

Градоначалникот на Струмица, Костадин Костадинов денеска од директорот на Центарот, Ѓоко Камчев ги прими клучевите од новото противпожарно возило како и дронот и прв ги испроба дали функционираат, а потоа ги предаде на командирот на струмичките пожарникари, Александар Гудев.

ФОТОГАЛЕРИЈА