Претседателскиот кандидат на СДСМ и Коалицијата, Стево Пендаровски попладнево имаше средби со жители од струмичкиот регион, односно во Ново Село, Босилово и Василево.
„Христијан Мицкоски и ВМРО-ДПМНЕ не направија ништо за државата кога беше потребно за европската иднина на Македонија. Опозицијата беше главната кочница и ги блокираше своите сограѓани и земја. Нека не ве лажат сега дека со нив подобро ќе живеете, нема иднина со тие луѓе, видовте што правеа кога беа на власт. Сите важни стратешки цели досега ги постигнавме ние. Сеат лаги за наводни навреди, а истите тие не сопреа од навредувања. Како што лажат за договорите кои ги постигнавме, така лажат и за сѐ друго, не им верувајте ништо“, изјави денеска кандидатот за претседател, Стево Пендаровски на средби со граѓаните во Ново Село.
Пендаровски пред жителите на Босилово порача дека е важно веќе во среда, на 24 април да се излезе масовно на изборите и да се заокружи бројот еден.
„Да не заборавите, уште во првиот круг ќе се види колку се за демократска, европска и просперитетна Македонија, а кои се за режим. Затоа е многу важно уште на 24 април да им покажеме дека има голем број на граѓани кои ја сакаат европска Македонија“, кажа Пендаровски.
Кандидатот за претседател Пендаровски порача дека само бројот еден е гаранција за продолжување на патот кон полноправно членство, а се друго е враќање назад во неизвеснот, поделби и изолација.
Зборувајќи пред граѓаните на Василево, Пендаровски потенцираше дека Македонија веќе е горда на постигнатото, а со Христијан Мицкоски и Гордана Силјановска Давкова државата ќе се врати назад во мрачното минато и единаесетгодишниот режим, затоа што како што кажа тој, во ВМРО-ДПМНЕ нема никаква промена.
„Дали ако дојдат на власт ќе се однесуваат поинаку? Не, никако. Александар Николоски е до Груевски кога даваат наредба за 27 април, Мицкоски исто на 27-ми влегува во парламент и наместо да се извинат тие сега најавуваат амнестија за тој упад. Не треба да им дадете власт“, рече Пендаровски.
Пендаровски повика на силна мобилизација и гласање за бројот 1 на 24 април во првиот круг на Претседателските избори.
„Не оставајте работите да ги решаваме на 8 мај треба на 24 април да им покажеме дека мнозинството наши граѓани не сака да се враќа во мрачните времиња. Немаме луксуз како држава да се враќаме назад и 20 години да чекаме, затоа што сите млади ќе се иселат, а нема држава која може економски да просперира ако нема млади. Ако добиеме доверба со оваа полотичка структура ние за 4 години ќе одиме напред, ќе одиме кон полноправно членство во ЕУ“, порача Пендаровски во Василево.
