![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Традиционално од Денот на независноста, па се до 13-ти септември во Струмица, во Храмот на културата повторно ќе се слави театарот, уметноста и бесмртното дело на великанот Ристо Шишков, годинава по 33-ти пат. Стартува Меѓународниот Фестивал на камерен театар „Ристо Шишков“, посветен на актерската игра.
Во шесте фестивалски денови, сцената ќе биде дом на извонредни театарски изведби од реномирани ансамбли и уметници, кои преку својата игра ќе понудат различни погледи кон светот, кон човекот, кон вистината.
Почетокот го направија струмичките актери со претставата „Синот“ од Флоријан Зелер, во режија и сценографија на Благој Мицевски, а на репертоарот се вкупно 12 претстави, и освен ансамбли од Македонија учество ќе земат и од Италија, Србија и Бугарија. Вкупно 40 актери ќе се претставуваат со своите изведби за единствената награда за најдобро актерско остварување – златен медалјон со ликот на патронот Ристо Шишков, плакета и парична награда од 1500 евра.
„Се радувам што и годинава имавме богат избор и тежок избор, затоа што се повеќе и повеќе има конкурентни претстави и актерски ролји за оваа награда. Бидејќи се работи за фестивал на актерот, кадешто единствена награда е наградата „Ристо Шишков“, Гран при за актерско остварување, се разбира, пред се, „водилја“ ми е претставите да имаат некое актерско остварување кое ќе биде конкурентно за оваа награда“ – кажа пред стартот на фестивалот селекторот на фестивалската програма, режисерот Љупчо Георгиевски.
Градоначалникот на Струмица, Костадин Костадинов го прогласи фестивалот за отворен и на сите учесници им посака квалитетна актерска игра.
Сите претстави ќе се одржуваат во Центарот за култура „Антон Панов“, а покровители на фестивалот се Министерството за култура и туризам и Општина Струмица.
