Ставени во функција подземните контејнери на шест локации во градот Струмица

Со цел за поуспесшно справување со отпадот од домаќинствата и правните субјекти и намалување на отпадот околу контејнерите кој дава лоша слика за градот, ЈПКД „Комуналец“ Струмица ги поставени најавените полуподземни контејнери со голем капацитет на шест локации низ градот и тоа, на улицата „24 Октомври“ (кај пицерија „Бонита“), кај Хотел „Вила Парк“, на улицата „Невена Стојкова“ (позади Хотел „Есперанто“), кај поранешно „Кино Балкан“, на двете страни од малиот градски парк, како и на улицата „Братство Единство“ (до маркетот на Црвена Ружа).

„Со веќе обезбедениот специјален камион за подигање на отпад од овие полуподземни контејнери, деновиве истите се ставени во функција и домаќинствата и правните субјекти можат да ги користат. Укажуваме дека е строго забрането фрлање на пепел во полуподземните контејнери, бидејќи може да дојде до појава на пожар внатре во самиот контејнер. За таа цел до секој полуподземен контејнер има поставено жолта канта која служи исклучиво за пепел од домаќинствата, никако за друг вид на отпад. Напоменуваме дека околу секој полуподземен контејнер не треба да се паркираат возила, бидејќи се оневозможува подигање на отпадот од камионот со дигалка“, велат од комуналното претпријатие, потенцирајќи дека некои несовесни граѓани ја покажуваат својата некултура и негрижа за животната средина со фрлање на отпад околу контејнерите и во контејнерите наменети за пепел.

„Да потенцираме дека отпадот се фрла внатре во контејнерите, а не се остава до нив. Затоа известуваме дека општинската Комунална инспекција интензивно ќе биде присутна на терен и секое оставање на отпад надвор од овие контејнери ќе биде евидентирано и ќе бидат поднесени пријави против тие граѓани кои тоа го прават“, додаваат од „Комуналец“.