![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
На својот 64-ти роденден познатиот струмички фотограф, вработен во Центарот за култура „Антон Панов“, Сречко Гунчев постави Изложба на фотографии насловена „Шарено со шарки“. Поводот освен роденденски, е и заминувањето во пензија од ова национална установа во која работеше безмалку 30-тина години.
„Моја желба беше Сречко да стане академски сликар, ама тој сакаше да стане академски фотограф, неговата желба се исполни мојата не“, на шега раскажуваше неговиот другар, актерот Ванчо Мелев, додавајќи дека Сречко не ја заборави четката за да може во текот на неговото фотографирање да се занимава и со сликарството.
Дури 1430 претстави во Струмичкиот народен театар, без репризи во изминатите 30 години ги фотографирал Сречко Гунчев. Ги овековечувал со фотографии сите настани кои се одржувале во Храмот на културата, Струмичкиот карневал, ФКТ „Ристо Шишков“, Струмица Опен фестивал и уште многу други културни и спортски настани. Неговата посветена работа е признаена и наградена во 2017 година со доделувањето на Годишната награда на Општина Струмица – „Свети Петнаесет Тивериополски свештеномаченици“.
Ова е осма самостојна изложба на фотографии на Сречко Гунчев во изминатите 10 години. Изложбата во Центарот за култура „Антон Панов“ во Струмица ќе биде отворена за посетителите во наредните десеттина дена.
