Спортски новинари од Југоисточна Европа дебатираа и се дружеа во Струмица на Симпозиумот – „Спортот за државата, државата за спортот“

„Спортот за државата, државата за спортот“, така беше насловен дводневниот Симпозиум на спортските новинари од Југоисточна Европа, кој во изминатите два дена се одржа во Струмица, а под генерално покровителство на Фондацијата „Заев – Едно општество за сите“.
Симпозиумот го отвори градоначалникот на Струмица, Костадин Костадинов, кој ги поздрави учесниците панелисти и спортските новинари од земјата и странство и им посака успешен Симпозиум, истакнувајќи дека Струмица отсекогаш била и останува спортски град кој поддржува настани кои се во функција на развојот на спортот. На панел дискусиите свои обраќања имаа новинари и спортски функционери од земјава и странство, како и претседателот на МОК, Даниел Димевски, кои говореа на пет теми: „Мир“, „Спорт“, „Здравје“, „Младост“ и „Радост“.
За мирот говореа поранешниот премиер Зоран Заев и долгодишниот претседател на МОК и политичар, Васил Тупурковски кои заедно со поранешниот премиер на Грција, Алексис Ципрас од Асоцијацијата на спортски новинари на Македонија добија Плакети за посебен придонес во афирмирањето на спортот, мирот, добрососедските односи и пријателство. Плакета доби и струмичкиот градоначалник Костадин Костадинов за посебен придонес во развојот и афирмирањето на спортот во Македонија.
Во рамките на панел дискусиите на Симпозиумот, Зоран Заев кажа дека за него постои само една и единствена награда за мир – а тоа е самиот мир. Тој истакна дека воените арсенали треба да се заменат со ползување на „оружјето” на совеста, добрата мисла и добриот збор, со „оружјето” на подадената рака, со „оружјето” на компромиси, пријателство, заедништво, соработка и отворање нови хоризонти кон иднината.
За Тупурковски, секоја војна нанесува огромни штети на спортот, во прашање се доведени и одржувањето на големи спортски настани.
На Симпозиумот учествуваа спортски новинари од Македонија, Хрватска, Босна и Херцеговина, Унгарија, Србија, Црна Гора, Бугарија, Грција и Кипар, како и потпретседателот на Светската Асоција на AIPS, Јанис Дарас, генералниот секретар на AIPS, Јуре Озмец и членови на Бордот на Европската асоцијација на спортски новинари.

По завршувањето на Симпозиумот спортските новинари од девет земји од Европа се дружеа во свечената сала на хотелот „Сириус“, а за пријатната забава со музиката се погрижија естрадните уметници Перо Христов, Благица Калева, Ленче и Горан Кукиќ. На забавата, на еден од главните организатори, спортскиот новинар Бошко Трпески му направија пријатно изненадување со торта за јубилејот 60 години новинарство, кое кај него побуди солзи радосници и емоции.
ФОТОГАЛЕРИЈА