Со креативен активизам и уметничка инсталација поставена на плоштадот „Гоце Делчев“ во Струмица, Платформата риболовци „Корморани“ во соработка со Центарот за современи уметности од Скопје предупредија на зачестената појава на рибокрадство со употреба на струја во струмичиот регион.
Идејата за оваа акција потекнува од група еколози и спортски риболовци собрани околу платформата „Корморани“, која се залага за зачувување на водените екосистеми и одржлив спортски риболов.
„Во последно време членови на платформата „Корморани” и многу други спортски риболовци и еколози сведочат за се позачестените појави на рибокрадство во струмичкиот регион, на акумулациите Турија и Водоча и на реката Струмица. Уловените риби нелегално се продаваат на пазарите и други канали без почитување на хигиенскo санитарни мерки, ладен синџир на достава и најчесто се бајати и полурасипани. За жал освен спортските риболовци надлежните институции не превземаат никакви посериозни чекори за спречување на овие појави кои го уништуваат рибниот фонд“, велат организаторите на настанот.
Тие велат дека загрижувачко е што покрај мрежи и други недозволени алатки рибокрадците се почесто користат и електронски направи за неселективно убивање на рибите со висок напон и висока електролитска фреквенција.
„Според најновите податоци од истражувањата на Европската агенција за безбедност на продуктите и храната, рибите и останатите водени организми убиени/уловени со струја и слични инструменти кои користат електролитички процеси се небезбедни за човекова исхрана и за исхрана на домашните животни. Во процесот на усмртување на рибите со електролитична висока фреквенција доаѓа до промена на молекуларната структура кај рибиното месо. Овие молекуларни промени на меките ткива ја менуваат структурата на месото со што истото станува неподобно и опасно за исхрана, а забележани се и појави на канцерогени клетки и структури кои претставуваат сериозна закана по човековото здравје“, рекоа на денешниот настан од платформата „Корморани”.
Велат дека поради овие факти со цел заштита на човековото здравје и заштита на рибниот фонд, заедно со платформата „Корморани” е иницирана оваа акција за да се подигне јавната свест и да не се купува илегално уловена и непроверена риба, но и да се предизвика реакција кај надлежните посериозно да се зафатат со контрола и спречување на илегалниот риболов.
„Периодот на мрест на рибите допрва започнува, затоа да им дадеме шанса на рибите, да им овозможиме шанса на наредните генерации да уживаат во благодетите на природата и да не дозволиме групи на криминалци да го уништуваат она што природата ни го дава, а спортските рибловци го негуваат со децении“, апелираат организаторите на акцијата.
Акцијата Стоп за рибокрадците е во продукција на програмата за уметнички и креативен активизам на Центарот за современи уметности од Скопје, во соработка со платформата риболовци „Корморани”.
