Синоќа во Музичкото училиште „Боро Џони“ во Струмица се одржа третиот концерт од првото издание на фестивалот „Подиум Ад Астра 2024“ што го организираше Здружението „Camerata Ad Astra“.
Двајцата млади македонски изведувачи Филип Велковски (кларинет) и Давид Павиќ (пијано) го имаа својот прв настап во Струмица и успеаја да ја кренат публиката на нозе, која пак ги испрати со бурни аплаузи.
„Беше навистина посебно да свириме пред толку верна публика и да бидеме дел од оваа музичка магија. Организацијата беше на највисоко професионално ниво, а атмосферата беше магична и неповторлива. Посебна благодарност за тоа што имавме прилика да бидеме гости на овој фестивал и да го заокружиме со изведбата која ќе остане во сеќавањата на сите нас. Благодарност и на публиката која ни даде неопислива енергија и топлина“ – напиша по концертот младиот кларинетист Филип Велковски.
Претходно во рамките на фестивалот концерт во Центарот за култура „Антон Панов“ во Струмица одржа младиот македонски пијанист Иван Стојанов и во Младинскиот центар на Општина Струмица – концерт на Александра Кировска, дипломиран гитарист на класична гитара.
Од Здружението „Camerata Ad Astra“ велат дека првото издание на фестивалот „Подиум Ад Астра 2024“ беше успешно реализирано, најавувајќи го и второто догодина со млади професионални музички уметници.
