Со концерт на трио „3-ОС“ од Хрватска отворен „Strumica Classic International Festival 2024“

Струмица – центарот на културата во источниот дел на Македонија и еден од најголемите центри во земјата, од синоќа е во знакот на класичната музика преку фестивалот „Strumica Classic International Festival 2024“, прв фестивал на класичната музика, кој по трет пат се одржува и веќе станува традиционален.

Се одржува од 1 до 9 јуни на три локации во Струмица, во Центарот за култура „Антон Панов“, во Црквата „Свети Петнаесет Тивериополски свештеномаченици“ и во Градската Уметничка галерија. Во овој седмичен музички интервал од нашето секојдневие ќе имаме можност да проследиме пет концерти со различни музички особености, а со учество на исполнители од четири земји, Македонија, Бугарија, Србија и Хрватска.

Фестивалот синоќа го отвори заменичката на градоначалникот, Елена Магеровска Паликарова.

„Струмица дала голем број познати имиња од различни музички области, а без сомнение еден од најврвните меѓу нив е и познатиот и признат обоист од светски калибар – Васил Атанасов, „главниот виновник“ за раѓањето на „Струмица Класика Меѓународен Фестивал“ кој годинава го доживува своето трето издание. Со овој фестивал, Струмица, во својата меѓународна културна понуда го има заокружено списокот на меѓународни фестивали од сите можни уметности. Слободно може да се каже дека ретки се македонските градови кои можат да се пофалат со таков културен живот и таква богата интернационална уметничка програма, каква што е струмичката“ – кажа Магеровска Паликарова.

Главениот иницијатор и реализатор на овој фестивал, еден од најпознатите светски обоисти и долгогодишен член на Македонската филхармонија, на Скопскиот дувачки квинтет и на Камерниот оркестар Скопски солисти, струмичанецот м-р Васил Атанасов, кој заедно со неколку професионални музичари од Филхармонија, Опера и колеги од Музичкото училиште „Боро Џони“ во Струмица го осмислија концептот на фестивалот, кажа дека Струмица е град со традиција и историско културно наследство од сите сфери, град што ги сака музичката уметност, театарот, филмот, сликарството и културата воопшто и има убава традиција на културни настани, а со овој фестивал се збогатува културното живеење на Струмица и регионот, со што станува културен уметнички центар на Балканот.

На првиот ден од фестивалот свој едночасовен концерт одржа триото „3-ОС“ од Хрватска, составено од Кирил Наумов, Жељко Штрбац и Мирослав Мајиќ, професионални дипломирани музичари, кои долги години активно соработуваат со културните институции во Хрватска како оркестарски уметници, како педагози во музичките училишта и како високи уметнички соработници на камерна музика на Академијата за уметност и култура во Осиек. Настапувале во Хрватска и во странство со истакнати хрватски и странски оркестри, ансамбли и камерни состави на голем број концерти.

Следниот концерт е во понеделник, 3 јуни во Црквата „Свети Петнаесет“ од 20:00 часот, а ќе настапат членовите на градскиот мешан хор „Гортинија“ од Гевгелија со диригентот Илија Атанасов.

„Strumica Classic International Festival 2024“ е финансиски поддржан од градоначалникот и Советот на општина Струмица.

ФОТОГАЛЕРИЈА