Од црковниот храм „Св. Кирил и Методиј“, како река создадена од 200 деца која се слеваше надолу низ улиците на Струмица и пееја во еден глас „Вечниот Бог“, се најави Христовото раѓање во градот на Петнаесетте Тивериополски свештеномаченици. Застанаа пред општинската зграда, а внатре ги пречекаа струмичкиот градоначалник Костадин Костадинов со советниците и Викарниот Епископ Стобиски г. Јаков. И ним ја испееја „Вечниот Бог“, а тие им подарија божиќни пакетчиња.
Реката од деца продолжи да се слева кон плоштадот „Гоце Делчев“ каде го одржаа традиционалниот Бадникарски концерт. Организирани во еден хор, заедно со вокално-инструменталниот состав „Стихири“ ги пееја божиќните каланди пренесувајќи ги нивните пораки, но и благословите и надежта за мир, љубов и радост во секое семејство.
Освен празничната порака, најмладите од Струмица со концертот ја пожааа и нивната хуманост. Сите донации што беа собрани ќе бидат наменети во хуманитарни цели.
„Мојата порака во пресрет на Божиќ не е ништо поразлична од онаа порака, од онаа песна, што ангелите ја испееја пред повеќе од 2000 години кога на светот ја споделија радосната вест дека се роди Христос“ – кажа денеска Викарниот Епископ Стобиски г. Јаков во изјава за медиумите пред почетокот на традиционалниот Бадникарски концерт, потсетувајќи на значењето на Христовото раѓање.
