Сообраќајка кај Лакавица – во едно од возилата била министерката Јована Тренчевска

Попладнево околу 17:30 часот на патот Штип – Радовиш кај селото Лакавица се случила сообраќајна незгода помеѓу две возила, а во едно од возилата била и министерката за труд и социјална политика, Јована Тренчевска.

Во незгодата учествувале патничко возило „Шкода“, сопственост на Владата, управувано од Г.А.(53), и патничко возило „Фолксфаген пасат“ со швајцарски регистарски таблички кое го управувал 48-годишник од селото Мокриево, струмичко.

Во сообраќајната незгода со телесна повреда се здобил возачот на шкодата Г.А., констатирана од лекар од Итната медицинска помош Штип. До сега не се пријавени повреди од друго лице. Увид на местото извршиле увидна екипа на СВР Штип и јавен обвинител, велат од МВР.

По сообраќајката со објава на Фејсбук се огласи министерката Тренчевска:

„Драги другари и другарки! Попладнево, по завршување на службените активности во мојата родна Струмица, на патот кон Скопје, се случи сообраќајна незгода, по која сакам да ги информирам сите мои најблиски и граѓаните дека сите сме во добра состојба. Ви благодарам на сите за искрените повици, пораки и загриженост за нашата добросостојба. Вечерва токму пред Бадник и големиот христијански празник Божиќ, чувствувам благодарност што Бог ме чуваше мене и мојот тим. Луѓето со кои го поминувам секој ден. Ви посакувам мир и спокој овие денови“, напиша министерката Тренчевска.