Советот на општина Струмица на денешната седница направи ребаланс на основниот буџет за тековната 2023 година. Од 805.098.000 денари го намали на 759.291.815 денари, што значи дека има намалување од 45.806.185 денари. Намалувањето произлегува како разлика од намалување на трансферите за 69.014.185 денари, намалена со зголемени приходи од ДДВ за 23.208.000 денари. Според градоначалникот на Струмица, Костадин Костадинов ребалансот значи нови проекти за доброто на сите граѓани.
На денешната 23-та седница мнозинството советници го усвоија извештајот за извршување на буџетот за првиот квартал од 2023 година како и повеќе одлуки од областа на урбанизмот, одлука за промена на режимот на сообраќај на крстосница од улица „Младинска“, улица „Братство Единство“ и улица „24-ти Октомври“, одлука за приоритетен проект за изработка на инвестиционо техничка документација на ниво на Основен проект за улиците „Ристо Клепов” и „Боро Поцков” во урбан опфат на Блок 20 и улица „Сервисна улица” од деталниот урбанистички план за дел од Блок 16 и дел од блок 15 во општина Струмица, одлуки од работењето на Јавните претпријатија „Комуналец“, „Струмица Гас“ и новото претпријатие „Струмица транспорт“, а беа донесени и годишните планови за вработување во основните општински училишта за 2024 година.
Советниците дадоа зелено светло и на предлог одлуките за отстапување на патничко моторно возило на Фондацијата „Елеуса“ и парична помош за четворица граѓани од општина Струмица.
