Се смени власта во Струмица – клучот од градот во рацете на Цицимов и карневалскиот одбор

Во карневалски стил, со предавање на клучот од градот од страна на градоначалникот Костадин Костадинов на Александар Цицимов и карневалскиот одбор, со дефиле од општинската зграда до плоштадот во придружба на градскиот оркестар, со марш на мажоретките и нивни перформанс беше означен почетокот на годинашното издание на интернационалната манифестација, вековната традиција на струмичани – „Струмички карневал 2025“.

„Ова за сите нас е вековна традиција која мора да си ја чуваме и да ја пренесуваме на најдобар возможен начин. И токму тоа го правиме, и преку Советот на општина Струмица, и преку Карневалскиот одбор за што сум, како човек пред се, особено благодарен и преку овие убави мажоретки, на којшто денеска ја имам честа да го предадам клучот и конечно да здивнам од обврските коишто ги имам од секојдневието, оти нели власта оди во рацете на карневалистите“ – кажа во своето обраќање градоначалникот Костадинов упатувајќи јавна покана до сите добронамерници да ги следат карневалските активностите во наредните седум дена.

Претседателот на Организациониот одбор на Струмичкиот карневал, Александар Цицимов откако го прими клучот од градоначалникот кажа дека без избори ни ја предава власта на седум дена, но тоа не значи дека сака да се „отараси“ од неговите обврски, туку затоа што вековната традиција на Струмица и струмичките карневалисти тоа го заслужуваат.

„Веќе 35 години во континуитет Струмичкиот карневал кој прерасна во бренд на Македонија и кој минатата година беше присутен на СИ-ЕН-ЕН, кој „Бекстејџ“ го прогласи за најдобра културна манифестација во државата, тоа го заслужува. Ние и овој пат уште еднаш ќе ветиме дека овие денови Струмица ќе биде полна со смеа, радост, исполнета со карневалски дух“ – кажа Цицимов.

По настапот на мажоретките на струмичкиот плоштад и заедничко фотографирање, во Градската Уметничка галерија беше отворена изложба „35 години од обновената организирана форма на Струмичкиот карневал“, а потоа во Центарот за култура „Антон Панов“ се одржа настанот „Карневалски времеплов“ на СОУУД „Димитар Влахов“ од Струмица.