СДСМ Струмица реагира на предлогот за избор на Тања Дедејска за член на Државната комисија за одлучување во втор степен

Од Општинската организација на СДСМ Струмица реагираат на предлогот за избор на струмичанката Тања Дедејска, актуелен член на Советот на општина Струмица од редовите на ВМРО-ДПМНЕ за член на Државната комисија за одлучување во втор степен, кој македонското Собрание ќе го разгледува на утрешната седница.

„Во нашата парламентарна демократија, една од најголемите иронии е изреката „се’ е согласно Уставот и законите”. Во Собранието, како институција која именува членови на разни комисии, често се појавуваат кандидати кои се претставуваат како „непартиски”, иако редовно потврдуваат дека не се членови на политички партии (како што бара законот).

На утрешната седница, пред Собранието ќе се разгледува предлог-одлуката за избор на член на Државната комисија за одлучување во втор степен. За овој член, се предлага Тања Дедејска, која, како што вели, на нотар е потврдила дека не е член на никаква политичка партија.

Но, интересно е тоа што Дедејска во моментов е советник на ВМРО-ДПМНЕ во Советот на општина Струмица, иако нејзината нотарска изјава тврди спротивното – дека не е партиски поврзана.

Не дека не сме свесни како партиите ги поставуваат своите луѓе во ваквите комисии, но дали е навистина потребно да се избираат актуелни советници за „непартиски” позиции во овие тела?“ – стои во реакцијата на ОО на СДСМ Струмица.