СДСМ со Трибина во Струмица – „Резултати што прават разлика“

„Не така одамна, „Заробена држава“ ни беше името во еден Извештај на Европската комисија. Тогаш кога ВМРО ДПМНЕ беше власт, кога се шепотеше, кога се молчеше за платите, за пензиите, за сите неправди. Граѓаните со страв и сила беа замолкнувани. Тоа важно е да не се заборави, зашто волкот не станува јагне. Последниот Извештај на Европската комисија, еден добар дел од негативните оценки, се однесува на нив како сегашни или поранешни кочничари на реформите и креатори на политиката на одалечување од ЕУ. ДПМНЕ се кочничари на државата“, кажа денеска заменик претседателката на СДСМ, Сања Лукаревска, на трибината „Резултати што прават разлика“ што се одржа во Центарот за култура во Струмица.

За Љупчо Николовски, член на Централниот одбор на СДСМ и министер за земјоделство, шумарство и водостопанство секој еден земјоделец е важен и преку конкретни мерки и политики што секојдневно се носат, во дело оваа Влада покажува дека е искрен партнер и води грижа за секој еден земјоделец.

„Земјоделците денес најдобро знаат која е разликата меѓу СДСМ и ВМРО. Знаат како беше во времето на ДПМНЕ, да се добиваат субвенции селективно, со списоци и закани, но знаат како е и денес кога СДСМ ја води државата. Со еден потпис, во еден ден, со едно решение, исплата кон сите земјоделци, кои исполнуваат услови. Без селекција, без списоци, без притисоци. Бидејќи за нас земјоделецот е важен. Бидејќи за нас секој човек е важен и почитуван. За разлика од нив кој немаат ни почит кон никого и ништо, ниту пак чуле некогаш за тоа. Од 2017 година до денес, Министерството за земјоделство работи транспарентно и отворено, со нов земјоделски пристап. Постојано сме на терен, диреткно од земјоделците ги слушаме проблемите и заедно со нивна директна вклученост ги носиме и ги креираме мерките, а така креираните мерки докажано даваат резултати“, кажа Николовски.

„Секогаш кога било потребно СДСМ бил тука за земјоделците обезбедувајќи брза и навремена поддршка. Минатата година, во услови на светска криза ние бевме први во регонот кои навремено подготвија Национален план за производство на храна и креиравме Интервентни мерки за да го стабилизираме и помогнеме домашното производство на храна“, кажа Трајан Димковски, претседател на комисијата за земјоделство на СДСМ на денешната трибина во Струмица.

Никица Бачовски, член на Централниот одбор на СДСМ и директор на Агенцијата за финансиска поддршка во земјоделството и руралниот развој говорејќи на трибината, кажа дека Агенцијата стана препознатлива како институција која финансиски ги помага сите земјоделци и не служи како алатка за исполнување на партиски интереси.

„Нејзина основа задача е подеднакво да ги поддржува градинарите од струмичко, гевгелиско и валандовско, тутунарите од Прилеп и Радовиш, лозарите од тиквешкиот регион , овоштарите од Росоман и Преспа, полјоделците од Битола и Свети Николе, сточарите од малишевијата и полошкиот регион“, кажа Бачовски потенцирајќи дека преку Програмите за директни плаќања, Програмата за рурален развој, Програмата за рибарство и аквакултура, како и ИПАРД Програмата годишно со финансиски средства се стекнуваат десетици илјади корисници.