СДСМ со прес конференција во Струмица пред најавениот протест на екологистите од струмичкиот регион

Пред протестната блокада во центарот на Струмица најавен од еколошките друштва „Здрава котлина“ од Струмица и „Еко долина“ од Ново Село, а како реакција на владината одлука за спојување на концесиите за отворање на рудник кај Иловица и Штука од страна на компанијата „Еуромакс Рисорсес“, СДСМ во Струмица одржа прес конференција.

„СДСМ го реафирмираше ставот на партијата даден пред граѓаните на Босилово, Василево и Ново Село, во однос на постапката за отворање на рудник во Иловица и склучувањето на договорот за концесија од страна на Владата на Никола Груевски и ДПМНЕ, во време кога Мицкоски беше негов советник. Ставот на СДСМ по однос на отворањето на рудникот во Иловица е ист со ставот на граѓаните од струмичкиот регион! Владата предводена од СДСМ и надлежните институции нема да дозволат отварање на рудник во Иловица, без консултација и одобрение од граѓаните, од локалното население, без запазување на целата постапка и без исполнување на сите стандарди за животна средина согласно постојното законодавство, усогласено со европското“, кажа на денешната прес конференција во Струмица, Јована Тренчевска, претседателка на Форумот на жени на СДСМ и министерка за труд и социјална политика, потенцирајќи дека Владата во координација со премиерот и министрите ќе ја преиспитат Одлуката за спојување на двете концесии и ќе побарат дополнителни информации од надлежното министерство.

„Заштитата на животната средина, здравјето на луѓето и развојот на земјоделието се приоритети на СДСМ“, додаде Тренчевска.

Министерката за животна средина и просторно планирање, Каја Шукова говорејќи за донесената одлука со која Владата ги спои двете концесии на компанијата „Еуромакс Рисорсес“, кажа дека станува збор за две различни постапки врз основа на којшто одлучува судот. Едната е постапката за доделување на концесија, а другата е постапката за спојување на двете веќе доделени концесии, односно за двете подрачја во еден опфат, објаснуваше министерката Шукова.

„Во однос на втората постапка, којашто е посебна постапка за спојување на концесии судот не го отфрла спојувањето на концесиите, туку ја отфрла постапката. Вели дека повторно треба да се врати на одлучување во Владата. Она што е битно да кажеме дека административно де факто се спојуваат, значи не се зголемува концесискиот обем, не се зголемува обемот на експлоатација, административно се спојуваат две концесиски полиња, но ние повторно ќе ја разгледаме одлуката за спојување на концесиите врз основа на дополнителни информации коишто веќе се побарани од Министерството за економија“, кажа Шукова.

Двете министерки во Владата предводена од СДСМ најавија дека за половина час ќе се приклучат на протестот што го организираат екологистите од струмичкиот регион насловен „Заедно против рудникот“.