СДСМ: Граѓаните на струмичките општини треба на референдум да се изјаснат дали се за отворање на рудникот кај Иловица и Штука

Централниот одбор на СДСМ денеска одржал седница на која членовите на одборот дискутирале за повеќе актуелни теми и донеле повеќе одлуки и заклучоци, меѓу кои и за темата за отворање на рудник за бакар и злато кај Иловица и Штука на Огражден.

Оваа тема повторно се актуализираше по владината одлука за спојување на концесиите на Еуромакс, компанијата која се застапува за изградба и операција на овој рудник, за експлоатација на минерални суровини на ова подрачје и реакцијата од активистите против отворање на рудникот кои веќе најавија протестна блокада на центарот на Струмица за да го искажат незадоволството од актуелниот тек на настаните.

Владејачката партија смета дека граѓаните на општините Струмица, Василево, Босилово и Ново Село треба на референдум да се произнесат дали треба да се отвори овој рудник.

„Ставот на СДСМ е дека само граѓаните на Југоисточниот плански регион, во општините Струмица, Босилово, Василево и Ново Село, можат да одлучат и треба на референдум да се произнесат за ова важно прашање. Заштитата на животната средина, здравјето на луѓето и развојот на земјоделието се приоритети на СДСМ“, заклучил Централниот одбор на партијата.

Инаку, во септември 2017 година во општините Босилово и Ново Село се одржаа референдуми на кои граѓаните на овие општини можеа да се произнесат дали се за или против отворање на рудникот за бакар и злато кај Иловица и Штука. Но, референдумите и во двете општини беа прогласени за неуспешни поради недоволна излезност.

Одборот го реафирмирал ставот на партијата дека дозвола за отворање на овој рудник не треба да се даде без консултација и одобрение од месното население, без запазување на целата постапка и без исполнување на сите стандарди за животна средина. Владејачката партија во соопштението се повикува и на тоа дека постапката за отворање на рудникот била започната од владата на нејзиниот политички ривал, Никола Груевски.

„СДСМ го реафирмираше ставот на партијата даден пред граѓаните на Босилово, Василево и Ново Село во однос на постапката за отворање на рудник во Иловица, започната од Владата на Никола Груевски и ДПМНЕ, во време кога Мицкоски беше негов советник. Без консултација и одобрение од граѓаните, од локалното население, без запазување на целата постапка и без исполнување на сите стандарди за животна средина согласно постојното законодавство, усогласено со европското, нема да се даде дозвола за отворање на рудник“, соопштија од владејачката партија.