Света Божествена литургија во чест на Светите Петнаесет Тивериополски свештеномаченици

Денеска Струмица ги празнува заштитниците на градот, Светите Петнаесет Тивериополски свештеномаченици.

По повод празникот, утринава во Манастирот „Св. Петнаесет Тивериополски маченици“ во Струмица се одржа Света Божествена литургија со која чиноначалствуваше Епископот Нишки г. Арсениј во сослужение на Митрополитот Тетовско-гостиварски г. Јосиф, Митрополитот Струмички г. Наум, Епископот Делчевско-каменички г. Марко и Епископот Стобиски г. Јаков.

Епископот Нишки г. Арсениј, во својата беседа кажа дека оваа место на кое што стоиме денес е осветено со крвта на Светите Петнаесет Тивериополски Маченици, кои храбро и бестрашно ги положија своите животи за Христос, следејќи ги неговите зборови: „Ако некој сака да врви по Мене, нека се одрече од себе, нека го земе својот крст и нека Ме следи“.

„Христовото Евангелие е повик да го земеме својот крст и да одиме по Христос. Бог на овој свет не му ветува ниту среќа, ниту награди, ниту позиции, воопшто не му ветува лесен евангелски живот. Наместо тоа, Тој на своите ученици им ја покажува целата тежина на евангелскиот крстоносен пат низ историјата и животот во овој свет. „Вистина, вистина ви велам дека вие ќе заплачете и ќе заридате, а светот ќе се радува, вие ќе бидете нажалени, но жалоста ваша ќе се претвори во радост“, кажа Епископот Нишки г. Арсениј.

Викарниот Епископ Стобиски г. Јаков порача секогаш да се држиме до Светите Петнаесет Тивериополски Свештеномаченици затоа што тие се наши заштитници пред Бог.

„Да се држиме за Светите Петнаесет, за нивното маченичко сведоштво со крв и да се држиме за Господ и за Црквата негова. Не престанувајте да ги призивате во вашите молитви, оти ние сме нивен удел, нивна награда и нивна слава, какви и да сме. Тие се наши заштитници и покровители, нѐ сакаат и се молат на Бога за нас. Да се држиме за нив. Тие со своите свети молитви, со својата слобода пред Бог ќе нѐ држат за Црквата, за Царството Небесно и заради нивните свети молитви и ние ќе го наследиме уделот кои тие го имаат, вечноста, Царството Божјо и непрестајната радост во Триипостасниот Бог, Отецот, Синот и Светиот Дух“, кажа Викарниот Епископ Стобиски г. Јаков.

„Со тоа ја покажуваме соборноста на нашата Света Православна црква чествувајќи во соборност заедно на Светата Божествена литургија и од посебна радост за сите струмичани коишто беа дел и присуствуваа на Светата Божествена литургија, бидејќи Светите Петнаесет Тивериополски свештеномаченици се големи светители коишто уште оддамнина на оваа територија ги празнувале сите луѓе, посебен култ има кон Светите Петнаесет Тивериополски свештеномаченици“ – кажа во изјава за медиумите отец Даниел Ѓоргиев, старешина на Манастирот „Св. Петнаесет“.

На Светата Божествена литургија покрај многуте верници присуствуваа и градоначалникот на Струмица, Костадин Костадинов со членовите на Советот на општина Струмица, градоначалникот на Кукуш, Грција, Димитрис Киријакидис, конзулот на Република Србија во Охрид, Михајло Филев, директорот на Комисијата за односи со верските заедници и религиозни групи, Даријан Сотировски, пратеници во македонскиот парламент од струмичкиот регион.

За верата во Христа и за нивната исцелителска моќ во Струмица и струмичко и денес се раскажуваат легенди. Струмица е горда и со достоинство го почитува и негува култот на Светите Петнаесет Тивериополски свештеномаченици.

ФОТОГАЛЕРИЈА