„Родителски Фронт“ со соопштение до јавноста, а во врска со одбивањето на дел од учесниците на закажаната јавна дебата на тема „До каде сме со родот?“

Од Здружението „Родителски Фронт“ кои во понеделник во Струмица ќе одржат дебата на тема „До каде сме со родот?“, испратија соопштение до медиумите со реакција за одбивањето на дел од учесниците на трибината, кои според нив уредно биле поканети и ги очекувале по понеделник.

Интегрален текст од соопштението:

„ИДЕОЛОГИЈАТА НЕ ПОДРАЗБИРА И НЕ ТОЛЕРИРА ДЕБАТА“

Почитувани,

Родителски Фронт откако уредно ги достави поканите на личните мејлови и службените на организациите коишто поканетите ги претставуваат сѐ до овој миг чекавме потврда како што беше и наведено во поканите, не реагирајќи на навредите и дисквалификувањата на некои од нив на нивните лични фб профили, во ним својствениот активистички манир. Ве известуваме дека своето присуство на дебатата го потврдија: д-р Петар Марков, претставник на ВМРО- ДПМНЕ, Аргирета Атева, претставник од Коалицијата за заштита на децата, Адвокат Душан Шарановиќ и Ѓорѓи Танушев, советник и претседател на Комисијата за еднакви можности на жените и мажите во Општина Струмица.

Од Игор Јадровски веднаш добивме повратен меил, во кој нѐ извести дека ќе биде отсутен од државата сметано од 16.04.2024-19.04.2024 година, и дека ќе треба да ја контактираме Комисијата, иако беше доставена истата покана и до Комисијата. Од Ирена Цветковиќ и Мила Царовска не добивме никаков одговор. Наместо тоа се огласија на своите лични фб профили, Цветковиќ со навреди, спинови и омаловажувања но и неиздржани оправдувања од типот ,,како да се избега од дебата со достоинство, а да не бидеш кукавица“, додека Мила Царовска со препорака да се прочита квази-новинарскиот прилог на Мета.мк, инаку уште едно милениче-организација на Фондацијата Отворено општество и фамилијата Сорос, на кои главната поента им беше зошто баш сега дебата во предизборен период!? Еве им одговор: Заради тоа што не сме глупи и наивни, а вие сте проѕирни, исто како и вашите поткупени пиони меѓу политичарите кои што веќе доминираат на изборните листи. Ако сакате поисцрпни одговори, повелете на дебата во понеделник, а неспособноста за дебата, страв од истата и задушувањето на општествениот дијалог е само потврда дека вашата агенда е идеологија, а за нас мотив да се бориме по секоја цена.

Од поранешната министерка Јована Тренчевска и предлагач на повеќе верзии на Законот за родова еднаквост ни трага ни глас, освен лајкчињата кај невладино-владината колешка од Хера, Мила Царовска. Важно, и во новата програма приоритети ѝ се: воспоставување на Секретаријатот, ,,Нов“ Закон за родова еднаквост, сеопфатно сексуално образование итн. Смета дека не сме достојни за нејзиниот одговор, присуство и објаснување, а од друга страна дека таа е достојна за нашиот глас на претстојните избори и да ѝ ја довериме нашата и иднината на нашите деца. Нека се стрпи уште малку и нека не се обидуваат да го ставаат Родителски фронт во партиски контекст, бидејќи ние сме надпартиско здружение на родители кое брои над 350 членови од различни партии и продолжува да расте. Не ги криеме нашите имиња и нашите лица бидејќи се бориме за нашите деца и нема човек, политичка партија ниту било каква сила на овој свет што ќе нѐ исплаши и поколеба.

Почитувани, ве информираме вас но и исплашениве од соочување и дебати, дека во понеделник дебата ќе има, а на нив ќе им стојат подготвени празни столчиња со личните имиња, како и на организациите што ги претставуваат во случај да се предомислат што особено би нѐ израдувало. Во спротивно, веќе имаме на претек нивни јавно искажани ставови во тв емисии, колумни но и „маркантни“ министерски мандати во повеќе ресори со девастирачки последици за образованието и иднината на нашите деца и македонското општество воопшто, а тие нека соберат храброст и нека дојдат да ги бранат, ако не заради личниот авторитет и достоинство, тогаш барем заради огромните пари што ги фрлаат на нив добропознатите ,,филантропи”.

Се гледаме во понеделник! Ќе биде искрено, европски, демократски, динамично и интересно!

Здружение „Родителски Фронт“ Струмица