Родителите на деца со попреченост бараат добивање статус на „родител-негувател“

На иницијатива и во организација на Здружението за помош и поддршка на лица со Даунов синдром „Вера“ од Струмица, во просториите на Градската Уметничка галерија во Струмица се одржа Панел дискусија за изменување и дополнување на Законот за социјална заштита и добивање на месечен надоместок за родител на лице со попреченост, односно добивање на статус „родител-негувател“ на еден од родителите на лице со попреченост.

Преку панел-дискусијата, родителите на деца со попреченост од Струмица повторно ја отворија темата за измена на Законот за социјална заштита и регулирање на нивниот статус. Тие остануваат цврсто на ставот дека овие измени се неопходни и дека државата мора системски да ги поддржи со редовни месечни примања.

Родителите јасно порачаа дека не бараат ниту привилегии, ниту милостина, туку еднакви права и можност за достоинствена егзистенција, која во моментов им е ускратена. Најголемиот дел од нив велат дека се принудени да ги напуштат своите работни места за целосно да се посветат на грижата за своето дете.

За д-р Ѓорги Јанев, специјалист по медицина на трудот и доктор на науки во областа на здравствена политика и менаџмент, барањата на родителите се целосно оправдани. Тој смета дека законски измени се неопходни, но предупредува дека пред да се преземат какви било конкретни чекори, мора да се воспостави национален регистар на лица со попреченост.

Се планира да се одржат уште неколку панел дискусии во повеќе градови во државата за да се информираат родителите како и сите граѓани што е целта на оваа иницијатива. Веднаш потоа ќе се формира Координативно тело од родители на лица со попреченост и понатаму ќе се побара средба со министерот за труд и социјална политика.

Освен претставници од невладините организаци, на панел дискусијата присуствуваа и голем број граѓани, пратеници, советници, стручни лица, како и претставници од верските заедници кои ја даваат својата поддршка кон родителите на деца со попреченост.

ФОТОГАЛЕРИЈА