Реакција на ВМРО-ДПМНЕ Струмица „за проблемите“ на Старата чаршија

Од Општинскиот комитет на ВМРО-ДПМНЕ во Струмица, по објави на социјалните мрежи за поставување на велосипедска патека на Старата чаршија во Струмица, со реакција до медиумите.

„Градоначалникот на Струмица, Костадин Костадинов изгледа одлучил веќе да не прифаќа никаква критика. После 20 години локално владеење на СДСМ со Струмица, по личната брза политичка кариера, се чуствува охрабрено да мисли дека секој негов потег е оправдан и очекуван. Но, револтот на граѓаните од струмичката Стара Чаршија е долгогодишен, повеќеслоен и сега повторно активен, бидејќи: веќе никој не им се плаши!

Најпрвин, неколку неуспешни економски потези на СДС ја уништија Чаршијата како стопански важно место во градот. Веќе на секого му е јасно, дека заради инвестиции на одредени луѓе настрада централното градско јадро.

На Старата струмичка чаршија не е најголем проблем велосипедската патека, туку намерното уништување и запоставување. На пример, оваа година Старата Чаршија не беше украсена. А знаеме дека до скоро украси имаше на многу локации. На Старата Чаршија нема предвидено станици за градските автобуси. На Старата Чаршија клупите и урбаната опрема се буквално уништени и дотраени.

Да се зборува за запоставеноста на објектите, тротоарите и улицата на оваа споменична струмичка целина навистина е срамно.

За овие проблеми доволно е Костадин Костадинов да излезе на Старата Чаршија и да ги види.

Му предлагаме на Костадин Костадинов да го преразгледа и евентуално повлече овој банален потег со кој се доведува во прашање изгледот, работата и безбедноста на Старата Чаршија.

Струмичката чаршија го познава возењето на велосипеди уште од самото настанување. Струмичани ја паметат изреката „на точак дојде со автомобил си ојде“.

Но, за сите погрешно направени работи одговорност во Струмица следува за многу скоро време!“ – напишаа од ВМРО-ДПМНЕ.