Од „Здрава котлина“ ја објавија маршрутата на најавениот протестен марш низ улиците на Струмица како израз на граѓанско незадоволство од упорното нерешавање на проблемот со воздушното загадување во струмичката котлина со што Струмица е на 7-то место како најзагаден град во Европа.
Место на собирање (во сабота, 1 февруари) е во паркот кај Домот на АРМ во Струмица, а од таму стартува точно во 11:00 часот со движење кон улицата „24 Октомври“, се поминува покрај поранешната управна зграда на ЈПКД „Комуналец“, се продолжува кон улицата „Младинска“, покрај главната болница до кружниот тек кај „Мавровка“, десно по булеварот „Гоце Делчев“ до кружниот тек кај главната пошта, а потоа до раскрсницата кај ТЦ „Глобал“. Од главната раскрсница се свртува лево по булеварот „Ленинова“, покрај Основен суд Струмица, а маршот ќе заврши пред зградата на Општина Струмица кај канцелариите на инспекциските служби, каде ќе има обраќање на еко активисти и граѓани со пораки и барања до локалната и централната власт.
„Ќе ги посочиме нештата што мора да се променат, и во името на сите граѓани ќе искажеме конкретни и прецизни мерки од кои ќе нема отстапување. Пресудно е да се врши јавен притисок и тоа е најефективно во отсуство на резултати кои со години ги чекаме да ситигнат. Она што досега добивме се полни болници и жални вести. Струмица не смее да остане 7-ми најзагаден град во Европа и токму тоа зависи од сите нас“ – велат организаторите со повикот: „ИЗЛЕЗЕТЕ НА ПРОТЕСТ ЗА ВАШИТЕ НАЈМИЛИ“…
Сабота, 1 февруари | старт 11:00 часот | кај Дом на АРМ Струмица
