Општина Струмица и Програмата за развој на Обединетите Нации (УНДП) денеска во 18:00 часот во хотел „Вила Парк“ во Струмица организира Форум на заедницата во рамките на проектот „Справување со загадувањето на воздухот“. Форумот има за цел да ги вклучи граѓаните во решавањето на проблемот за аерозагаденоста која во Струмица е доста изразена пред се во зимските месеци. Ќе бидат одржани две форумски сесии од кои првата ќе биде вечерва во 18:00 часот на која може да биде присутен секој граѓанин кој има предлог или идеја како да се намали аерозагаденоста во Струмица.
Целта на првата форумската сесија е да се претстават резултатите од мониторингот на квалитетот на воздухот и главните извори на загадување на воздухот во Струмица, мерките и активности за справување со загадувањето на воздухот и да се одговори на прашањето како да се идентификуваат потребите на најранливите групи на граѓани за почист воздух. Учесниците на првиот форум, исто така, ќе имаат можност да дискутираат за одредени мерки и предлози за начинот на кој може да се унапреди квалитетот на воздухот во општина Струмица.
На втората сесија кој би се одржала според најавите во месец октомври пред граѓаните ќе се претстават неколку конкретни мерки, со цел да се одберат најсоодветните кои општината заедно со УНДП ќе може да ги спроведе во текот на 2025 година, а треба да придонесат за намалување на аерозагаденоста. Тие мерки може да се фокусираат на зголемување на енергетската ефикасност на училиштата, замена на нееколошките системи за греење во јавните општински објекти, поставување на системи за производство на струја од обновливи извори, изградба на велосипетски патеки, креирање на парк-шуми .
Фондот кој е на располагање за спроведување на мерките изнесува околу 340.000 американски долари. Општината се очекува да кофинансира половина од средствата за оваа намена.
Проектот „Справување со загадувањето на воздухот“ е дел од Програмската рамка на УНДП, финансирана од Шведска. Проектот го имплементира УНДП во партнерство со Министерството за животна средина и просторно планирање и општините Кавадарци, Куманово, Гостивар, Струга и Струмица. Во рамките на програмата исто така се спроведува и проектот „Градење на општинските капацитети за имплементација на проекти“.
