![almak](https://strumicanet.com/wp-content/uploads/2024/10/sr-net-optimized.jpg")
Прекрасни гласови вечерва одекнуваа од Божјиот храм „Св. Петнаесет Тивериополски свештеномаченици“ во Струмица. Моќни гласови, чиниш ангелски создадени од Бога, во еден амбиент во кој се создава спокој, а во тишината само се слушаат тие ангелски гласови, како да доаѓаат од високо, а се пред тебе. Дваесеттина гласови на Градскиот мешан хор „Гортинија“ од Гевгелија, под диригентство на Илија Атанасов.
Вечерва струмичани, оние кои беа во Црквата „Св. Петнаесет“ ја имаа ретката можност да уживаа во интерпретациите на овие хористи кои одржаа свој концерт во рамките на третиот „Strumica Classic International Festival 2024“.
Ја отпееја божествено свечената песна за сесловенските браќа Кирил и Методиј за која добија громогласни аплаузи, пееја дела од Де Палестрина, Антон Бучнер, Оља Геило, од Атанас Бадев, Николај Кедров, Мокрањац, од Петар Илич Чајковски.
Хорот „Гортинија“ (античкото име на Гевгелија) е формиран во 2003 година. Во моментов членовите на хорот се аматери пејачи од различни возрасти, ентузијасти со голема љубов кон хорската уметност. Во досегашното постоење, хорот остварува богата концертна дејност, како во државната така и на меѓународна сцена, освојувајќи голем број високи награди.
Диригентот Илија Атанасов дипломира хорско диригирање и музичка теорија и педагогија во класата на проф. Драган Шуплевски во 1996 при Факултетот за музичка уметност во Скопје. Магистрира на истиот факултет, а специјализира хорско и оперско-симфониско диригирање на конзерваториумот „Николај Римски-Корсаков“ во класата на Валериј Успенски во Санкт Петербург, Русија.
Фестивалот на класичната музика во Струмица продолжува во среда, 5 јуни, во Градската Уметничка галерија со концерт на „Дуо гитари“ со Цветелина Брешкова и Божидара Трохарова од Бугарија. Концертот започнува во 20:00 часот.
