„Колку повеќе знаеш, толку повеќе вредиш“. Општина Струмица се стреми, оваа позната мисла да најде плодна почва во нашата заедница“ – кажа градоначалникот Костадин Костадинов на презентацијата на Нацрт-стратегијата за развој на образованието на Општина Струмица, за периодот од 2023 до 2027 година која денеска се одржа во Домот на АРМ во Струмица.
Костадинов вели дека иако поголем дел од надлежностите во образованието се во ресорното министерство, сепак останува обврската на општината постојано да ги подобрува условите за работа на учениците и наставниците.
„Општина Струмица, која има девет основни и три средни училишта, навистина сериозно вложува во развојот на образованието, посебно во најразлични вонобразовни активности кои се во надлежност на Општината. Ако до 2021 година општината вложуваше 3,5 до 4 милиони денари, оваа година, во буџетот за 2023 година, планирани се 14 милиони денари. Тоа е особено важно за имплементација на проектот „Активни училишта“ во средното образование“ – кажа Костадинов.
Пред присутните просветни работници, членови на Советот и ученици, Костадинов истакна дека преку овој документ, кој се подготвуваше пет месеци со учество на најразлични категории граѓани и бизнис секторот, ќе ги остварат стратешките цели, а ќе се обезбеди и современи услови за создавање на сеопфатна, стимулативна, инклузивна и интегрирана средина за учење и работа.
