На патрониот празник на градот Струмица – Светите Петнаесет Тивериополски свештеномаченици во фоајето на Центарот за култура „Антон Панов“ е поставена изложба на мозаици создадени од ликовниот уметник Ѓорѓи Томовски.
„Пред нас се делата на Ѓорѓи Томовски чија содржина е реализирана во две сликарски техники: масло и мозаик. Мозаикот е една особено сложена техника. Тоа е техника во којашто можностите за изразување и пренесување на идејата, во однос на сликарството, се посложени и ограничени. Тој се служи главно со природен камен, низ кој како акцент провејува венецијанско мозаичко стакло – смалти. За успешно да ги сплоти идејата и ликовноста, Томовски користи материјали и постапки кои отскокнуваат од класичните мозаички техники. Во неговите мозаици се гледа цизелирано сплотување на камчињата и умешно воден цртеж врз обоената подлога. Благодарајќи на овој опит, тој го преточува во мозаик нашето културно наследство и искуството на македонските занаетчии чиишто ракотворби: пафти, појаси, килими и друго, на своевиден начин ги транскрибира и мајсторски ги реализира. Кон овие мотиви се надоврзуваат и неговите најнови зафати во апстрахирањето на старите словенски букви“ – кажа професорот Газанфер Бајрам, кој ја отвори изложбата на мозаици во Струмица.
Оваа изложба е во пресрет на големиот јубилеј – 20 години творештво на уметникот Ѓорѓи Томовски, кој во новата 2025 година ќе ја одбележува со караван од серија на изложби, а неслучајно караванот го почнува од Струмица, бидејќи како што кажа Томовски, 20 години е присутен на меѓународната Струмичка ликовна колонија, почетоците ги направил токму во Струмица.
„Оттука потекнува се, и за мене ова е интимна врска и еден поттик голем од тука да го почнам караванот со изложби низ Македонија по повод мојот 20-годишен јубилеј. Задоволство ми е и што изложбата ја отворам на денот на празникот на градот Струмица – 11 декември“, кажа авторот Ѓорѓи Томовски.
Томовски пред струмичката публика претставува 40 мозаици, кои во наредните десеттина дена ќе можат да се видат во фоајето на Центарот за култура „Антон Панов“ во Струмица.
