Пратеникот во македонското Собрание од редовите на ЗНАМ – За наша Македонија, Миле Цеков од Струмица, кој на последните Парламентарни избори беше носител во Изборната единица 4, поднесе амандмани на новиот Предлог-Буџет за 2025 година со кои бара изградба на експресен пат Смоквица – Валандово – Струмица – Ново Село – Граничен премин со Бугарија и експресен пат Радовиш – Струмица.
Пратеникот Цеков со амандман бара од буџетот да се обезбедат 2.030.000.000 денари за изградба на експресен пат од Граничниот премин „Ново Село“ до Струмица, преку Моноспитово, Свидовица, Куклиш. Според него, изградбата на оваа делница е предвидено во веќе постоечкиот проект за експресен пат кој ќе го поврзува Коридорот 10 од Смоквица преку Валандово, Струмица до Граничен премин „Ново Село“.
„Според официјалните податоци собрани од фиксните автоматски бројачи на возила на патиштата, 2 – најфреквентен патен правец е патот Струмица – Ново Село со 12.903 возила на ден. Според бројот на загинати на патиштата е 7-ми по ред на анализата за јавен ризик“ – истакнува Цеков.
Тој вели дека оправданоста за овој проект е веќе утврдена и за него има изработена проектна документација. Вкупниот проект е проценет со вредност од 100 милиони евра, а наведената делница е една третина од проектот.
Цеков со друг амандман бара да се обезбедат околу 15.375.000 денари за изработка на проектна документација за промена и прилагодување на нов експресен пат Радовиш – Владевци – Струмица.
„Како пример за проектна документација може да се земе во предвид известувањето за намера за изведување на проект Надградба на магистрален пат М-6, Штип – Струмица во автопат и спроведување постапка за утврдување на потребата од оцена на влијание врз животната средина“, вели во образложението пратеникот Цеков.
Тој бара со новиот буџет да се обезбедат средства и за рехабилитација на патот од Костурино до Валандово, односно делницата „Валандовско брдо“, како и амандман за обезбедување средства за изработка на проектна документација за изградба на експресен пат од Владевци преку Василево – Пиперево, кој би требало да излезе меѓу Струмица и Дабиље и да се поврзе пред Куклиш.
„Јас како пратеник од Изборна единица 4, сметам дека треба да се зема во предвид Југоисточниот регион, кој учествува со 12% во БДП по глава на жител, после скопскиот регион. Граничи со две европски земји, учествува со 10% во вкупниот извоз или околу 500 милиони евра. Живеат 188.000 жители во 10 општини во 188 населени места, а има најлоша патна инфраструктура во државата. И оттука ги поднесувам амандманите, бидејќи во последните 15 години нема апсолутно никакви капитални инвестиции во патната инфраструктура. Ова се потребите на граѓаните од овој регион и истите имаат една цел, подобрување на квалитетот на живеење и зголемување на животниот стандард“ – вели пратеникот Миле Цеков.
