Денеска во дворот на Црквата „Св. Никола“ во селото Градашорци, општина Василево се одржа традиционалната манифестација „Ден на празот 2023“ или позната како „Празијада“.
Присутните имаа единствена можност да дегустираат специјалитети од праз и да уживаат во содржини од културно забавен карактер за кои се погрижија Благица Калева, Андријана Јаневска, ученици од основните училишта „Гоце Делчев“ и „Атанас Нивичански“, а свој настап имаа и членовите на КУД „Сушевски бисери“ од Сушево.
Домаќинките понудија деликатеси на трпеза какви што само може да посакаат вистинските сладокусци. Секакви баници, пити и погачи, праз со риба, тава со свинско и праз и десетици други јадења во кои празот царува.
Свое обраќање на Манифестацијата имаше градоначалникот на општина Василево, Славе Андонов кој им се заблагодари на огромниот број граѓани за присуството и што овој ден одлучиле да го поминат во Градашорци и притоа им порача со себе да си понесат по „едно топче“ од најквалитетниот, надалеку познат градашорски праз, да ја пренесат пораката за неговиот квалитет и Манифестацијата која во негова чест секоја година се одржува првата недела од месец ноември, во период кога е во ек собирањето на празот од нивите и негов пласман.
Меѓу бројните домашни и странски гости беа и заменик градоначалничката на збратимената општина Понтенуре, Италија, Анџела Фагнони, претставници од општина Кресна, Бугарија, амбасадорите на Италија и Австрија во Македонија, Андреа Силвестри и Мартин Памер и лидерот на ВМРО-ДПМНЕ, Христијан Мицкоски, претставници од верските заедници, градоначалници, пратеници, како и бројни соработници и партнери на Општина Василево.
„Празијадата“ во Градашорци се одржа по 14-ти пат. Покрај промотивниот карактер, оваа манифестација е и можност на едно место да се најдат производителите и трговците и да договараат нови пазари за празот.
